Səhiyyə naziri Qazaxda vətəndaşları qəbul edəcək

Səhiyyə naziri Oqtay Şirəliyev fevralın 11-də saat 10:00-da Qazax Müalicə-Diaqnostika Mərkəzində vətəndaşlar üçün qəbul keçirəcək.

Səhiyyə Nazirliyinin mətbuat xidmətindən Teleqraf.com-a bildiriblər ki, nazir Qazax, Ağstafa, Tovuz, Gədəbəy rayon sakinlərini qəbul edəcək və səhiyyə sahəsinə dair vətəndaşları maraqlandıran sualları cavablandıracaq.

Qəbulda habelə sakinlərin müraciətləri, şikayət, təklif və fikirləri nazir tərəfindən dinləniləcək və lazımi tədbirlər görüləcək.

Qəbula yazılmaq istəyən vətəndaşlar Qazax Müalicə-Diaqnostika mərkəzində qeydiyyatdan keçə bilərlər.