Tələbələr arasında biznes müsabiqəsinə start verildi

Təhsil Nazirliyi, Gənclər və İdman Nazirliyi, Azərbaycan Dövlət İqtisad Universiteti (ADİU), İnnovativ Biznes-İnkubator və “Kapital Bank” ASC-nin birgə təşkilatçılığı ilə tələbələr arasında “Made in Azerbaijan” biznes ideya müsabiqəsinə start verilib.

Müsabiqənin təşkilində məqsəd prezident İlham Əliyevin 18 yanvar 2016-cı ildə “Qeyri-neft məhsullarının ixracının stimullaşdırılması ilə bağlı əlavə tədbirlər haqqında” imzaladığı Sərəncamın tətbiqinə ali təhsil müəssisələri səviyyəsində dəstək vermək, tələbələr arasında sahibkarlıq fəaliyyətinə marağı təbliğ etməkdir.

Biznes ideyalar hazırlanarkən ideyaların Sərəncama və müsabiqənin missiyasına uyğunluğu; modern, orijinal, kreativ və aktual yanaşma; layihənin daxili bazarda tətbiqinin reallığı; sadələşdirilmiş və biznes ideya səviyyəsində maliyyə planı tələblərinin nəzərə alınması vacibdir.

Biznes ideya esse, təqdimat, video-çarx və digər formatda ola bilər.

“Made in Azerbaijan” biznes ideya müsabiqəsində bütün universitetlərin tələbələri iştirak edə bilər.
Müsabiqəyə qatılmaq istəyən tələbələr martın 10-dan aprelin 12-dək biznes ideyalarını elektron formatda müvafiq email ünvanına göndərə bilərlər. Ekspert Şurası Biznes ideyaları 3 gün nərzində dəyərləndirərək 6 finalçı müəyyənləşdirəcək. Aprelin 19-da müsabiqənin final mərhələsində tələbələr biznes ideyalarınını təqdim edəcəklər və münsiflər heyəti 6 finalçı arasından 3 qalibi müəyyən edəcək. “Made in Azerbaijan” biznes ideya müsabiqəsində I yerin qalibi 1000, II yer 750, III yer isə 500 manat mükafat qazanacaq.

SEVİL