13 İyun 2014 21:35
961
12 Punto 14 Punto 16 Punto 18 Punto

Bakı Ali Ümumqoşun Komandanlıq Məktəbi, indiki Heydər Əliyev adına Azərbaycan Ali Hərbi Məktəbi, sovet dövründən bu günədək Silahlı Qüvvələr üçün zabit kadrları hazırlayan nüfuzlu hərbi təhsil müəssisələrindəndir.

Müdafiə Nazirliyindən verilən məlumata görə, 1979-cu ildə Bakı Ali Ümumqoşun Komandanlıq Məktəbini bitirmiş, MDB ölkələrindən olan 40-dan çox məzun iyunun 12-si və 13-də həmin buraxılışın 35 illiyini qeyd etmək üçün ölkəmizə gəliblər.

Qonaqlar öncə Fəxri xiyabana gedərək Ümummilli lider Heydər Əliyevin və akademik Zərifə xanım Əliyevanın, həmçinin Şəhidlər xiyabanında Vətənimizin azadlığı uğrunda canından keçmiş şəhidlərimizin məzarlarını ziyarət edib və gül dəstələri qoyaraq ehtiramlarını ifadə ediblər.

Respublikamıza qonaq gəlmiş məzunlar, o cümlədən, həmin buraxılışın məzunları olmuş Müdafiə nazirinin birinci müavini - Silahlı Qüvvələrimizin Baş Qərargah rəisi general-polkovnik Nəcməddin Sadıkov və Azərbaycanın Milli Qəhrəmanı, Müdafiə Nazirliyi Baş İnspeksiyanın rəisi polkovnik Fəxrəddin Cəbrayılov təhsil aldıqları hərbi məktəblə, indiki Təlim və Tədris Mərkəzi ilə yaxından tanış olaraq idman kompleksi, yeməkxana, mehmanxana, tədris korpuslarına baş çəkib, trenajorların fəaliyyətini izləyiblər. Qonaqlar iki dəfə Sovet İttifaqı Qəhrəmanı Həzi Aslanovun məktəbin həyətindəki abidəsi önünə əklil qoyub və xatirə şəkli çəkdiriblər.

Tədbirin ən maraqlı məqamlarından biri də Təlim və Tədris Mərkəzində Azərbaycanın Müdafiə naziri general-polkovnik Zakir Həsənovun məzunlarla görüşü olub.

Mərasimdə çıxış edən Müdafiə naziri general-polkovnik Zakir Həsənov məzunları salamlayaraq, onlara xoş arzularını bildirib. Müdafiə naziri həmçinin özünün də hərbi təhsil illəri xatirlərini yada salaraq, məktəb məzunlarının bu cür görüşlərinin davamlı olmasını arzulayıb.

Həmin gün qonaqlar vaxtilə özlərinin də təlimlər keçdiyi "Üçtəpə" Təlim Mərkəzinə gedərək, son illərdə burada aparılan quruculuq işləri ilə tanış olublar.


Müəllif: