Onkoloji xəstəliklərlə bağlı mühüm addım

Səhiyyə Nazirliyinin Milli Onkologiya Mərkəzi (MOM) və İctimai Səhiyyə və İslahatlar Mərkəzinin (İSİM) birgə əməkdaşlığı ilə Milli Onkologiya Mərkəzinin nəzdində Xərçəng Xəstələrinin Registrinin (Kanser Registri) yaradılması ilə bağlı 2014-cü ilin noyabrından başlanan proqram yekunlaşıb.

Səhiyyə Nazirliyinin mətbuat xidmətindən Teleqraf.com-a verilən məlumata görə, proqram çərçivəsində 2015-ci ilin yanvar-mart ayları ərzində MOM və İSİM-in mütəxəssisləri ölkədən xaricdə təşkil olunmuş təlim kursları və təcrübə mübadiləsi proqramlarında iştirak ediblər. Onkoloji Xəstəliklərin Beynəlxalq Təsnifatı sisteminin (İCD-O-3) təcrüməsi və redaktəsi həyata keçirilib, Milli Onkoloji Mərkəzinin bir sıra daxili sənədləri Kanser Registrin tələblərinə uyğunlaşdırılıb. Beləliklə, Azərbaycanda ilk dəfə 2015-ci ildən başlayaraq, Səhiyyə Nazirliyi Milli Onkologiya Mərkəzinin bazasında Onkoloji Xəstələrin Registri yaradılıb.

Bu növ onkoloji registrlər dünyanın bir sıra ölkələrində mövcuddur. Əsas məqsədi bədxassəli yenitörəmələrin xəstəlik halları barədə tam məlumat bazasının yaradılması olan registr imkan verir ki, bu məlumatlar beynəlxalq standartlara uyğun olaraq təhlil edilsin. Xərçəng xəstəliklərinin registrində toplanan məlumatların təhlili, o cümlədən, müqayisəli təhlili, xərçəng xəstəliklərinin profilaktikası üçün müvafiq tədbirlərin görülməsinə, tətbiq olunan müalicə metodlarının effektivliyinin qiymətləndirilməsinə, əhalinin müxtəlif qruplarına hədəflənmiş profilaktik və diaqnostik tədbirlərin təşkilinə şərait yaradır.

Həmin registrlə işləmək üçün biliklərin artırılması məqsədilə 2016-cı il aprelin 18-22-də Xərçəng xəstəliklərinin tədqiqi üzrə Beynəlxalq Mərkəzin (IARC) regional mərkəzinin yerləşdiyi Türkiyənin İzmir şəhərində keçirilən “Onkoloji xəstəliklərin registri” mövzusunda kursa Azərbaycandan nümayəndə heyəti göndərilib.

Kurs çərçivəsində mütəxəssislər onkoloji registrlə iş barədə beynəlxalq təcrübəni öyrənməklə ölkəmizdə bu istiqamətdə uğurlu fəaliyyətin aparılması üçün biliklərə yiyələniblər.

Naibə QURBANOVA