Şəkidə 4 nəfər silah alverçisi həbs edildi

Şəki şəhərində silahlı şəxslərə qarşı əməliyyat keçirilib.

Teleqraf.com xəbər verir ki, daxil olmuş məlumat əsasında Daxili İşlər Nazirliyinin Baş Cinayət Axtarışı İdarəsi əməkdaşlarının əməliyyat-axtarış tədbirləri nəticəsində Şəki şəhər sakinləri, əvvəllər məhkum olunmuş Ceyhun Hümmətov və Səbuhi Abulhəmidovun Gürcüstan vətəndaşı Tangiz adlı şəxsə 1300 manata satmaq məqsədilə içərisində 1 avtomat, patron və patron darağı olan qutunu Bakı şəhərinə göndərmək üçün həmyerliləri Elşən Məhərrəmova verdikləri müəyyən edilib.

Görülmüş tədbirlərlə Ceyhun Hümmətov, Səbuhi Abulhəmidov və Elşən Məhərrəmov saxlanılıblar.

Elşən Məhərrəmov izahatında qeyd edilən qutunu Bakı şəhərinə aparması üçün həmyerlisi Elşən Göyüşova verdiyini bildirib.

İyunun 29-da Elşən Göyüşovun idarə etdiyi “Mercedes” markalı avtomobil Baş Dövlət Yol Polisi İdarəsinin əməkdaşları tərəfindən Qobustan rayonu ərazisində saxlanılıb və araşdırmalar aparılması üçün Şəki şəhər polis şöbəsinə təhvil verilib. Avtomobilə baxış zamanı içərisində “АКSU” markalı 1 silah, 24 patron və 1 ə patron darağı olan qutu aşkar edilib.

Səbuhi Abulhəmidovun Şəki şəhərində evinə baxış zamanı 1 ədəd “F-1” qumbarası aşkar edilərək götürülüb.

Hacı Zeynalov