Bakıda armaturlu gənc həbs olundu

Bakının Sabunçu rayonunda əlində dəmir armaturla gəzən şübhəli şəxs saxlanılıb.

Teleqraf.com xəbər verir ki, Bakıxanov qəsəbəsi, Eldar Xəlilov küçəsində 1998-ci il təvəllüdlü Balaxanı sakini İsmayıl Dostəlizadəni mühafizə polisi saxlayıb.

Özünü şübhəli aparan İsmayıl Dostəlizadənin əlində dəmir armatur olub. Barəsində tədbir görülməsi üçün o, Sabunçu rayon Polis İdarəsinin 12-cü bölməsinə təhvil verilib.

Aparılmış əməliyyat tədbirləri nəticəsində İsmayıl Dostəlizadənin iyunun 25-də Bakıxanov qəsəbəsi, S.Cabbarov küçəsi ev 2/84 ünvanının qarşısında yerləşən köşkdən 1000 manat məbləğində müxtəlif növ siqaret oğurladığı müəyyən olunub.

Bundan başqa, o, iyunun 29-da Bakıxanov qəsəbəsi, Hacınski küçəsi ev 39/3 ünvanda yerləşən ərzaq mağazasının qapısının dəmir barmaqlığını sındıraraq 500 manat və 400 manat məbləğində siqaret aparıb.

İsmayıl Dostəlizadə oğurluğa armaturla gedib. Mağaza və köşklərin qapı-pəncərəsini də armaturla sındırıb.

Hazırda İsmayıl Dostəlizadənin başqa cinayətlərdə iştirak edib-etməməsi araşdırılır.

Hacı Zeynalov