Şahidlərin məhkəməyə məcburi gətirilməsinə qərar verildi - Nardaran işi/YENİLƏNDİ

Bu gün Bakı Ağır Cinayətlər Məhkəməsində Taleh Bağırov, Fuad Qəhrəmanlı və digərlərinin cinayət işi üzrə günortadan sonraya təyin olunan məhkəmə prosesi baş tutmayıb.

APA-nın məlumatına görə, buna səbəb şahidlərin hakim Əlövsət Abbasovun sədrliyi ilə keçirilən prosesə gəlməməsi olub.

Növbəti iclas oktyabrın 26-dək təxirə salınıb. Hakim bildirib ki, şahidlərin barəsində məcburi gətirilməsinə qərar verilib və onların prosesdə iştirakı təmin ediləcək.

***

Bu gün Bakı Ağır Cinayətlər Məhkəməsində Nardaran hadisələrinə görə həbs edilən “Müsəlman Birliyi” adlı təşkilatın sədri Taleh Bağırov, Azərbaycan Xalq Cəbhəsi Partiyası (AXCP) sədrinin müavini Fuad Qəhrəmanlı və başqa 16 nəfərin cinayət işi üzrə məhkəmə prosesi davam etdirilib.

APA-nın məlumatına görə, hakim Əlövsət Abbasovun sədrliyi ilə keçirilən prosesdə Sabunçu rayon Polis İdarəsinin əməkdaşı Fərid Səlimov ifadə verib. O deyib ki, ötən il noyabrın 5-də futbol tədbirində olan zaman həyəcan siqnalı verildiyindən idarəyə gəliblər və orada bir qrup şəxsin yığışdığının, binaya tərəf daş atmalarnın şahidi olub. Hadisə zamanı xəsarət almayıb.

Sabunçu rayon Polis İdarəsinin əməkdaşı Samir Əzimov da şahid qismində dindirilib. Vəkillər onların şahidlik statusuna xitam verilməsini istəyiblər. Hakim vəsatəti baxılmamış saxlayıb.

Proses günün ikinci yarısında davam edəcək.

Taleh Bağırov Cinayət Məcəlləsinin 120-ci (qəsdən adam öldürmə) maddəsinin 120.2.1, 120.2.3, 120.2.4, 120.2.7, 120.2.12, 29,120-ci (qəsdən adam öldürməyə cəhd) maddəsinin 29, 120. 2.1, 29,120.2.3, 29, 120.2.4, 29,120.2.7, 29, 120. 2. 12, 228.3-cü (qanunsuz olaraq odlu silah əldə etmə), 228.4-cü (qanunsuz olaraq silah gəzdirmə) və digər maddələri ilə ittiham olunur.

Ötən il noyabrın 26-da hüquq-mühafizə orqanlarının əməkdaşlarının Bakının Nardaran qəsəbəsində keçirdikləri xüsusi əməliyyat zamanı Taleh Bağırov da daxil olmaqla 60-dan çox şəxs saxlanılıb. Həmin şəxslərdən bir neçəsinin cinayət işi digərlərindən ayrılaraq Sabunçu rayon Məhkəməsinə göndərilib, barələrində müvafiq hökmlər çıxarılıb.

AXCP sədrinin müavini Fuad Qəhrəmanlı isə ötən il dekabrın 8-də həbs edilib. O, Cinayət Məcəlləsinin 281-ci (dövlət əleyhinə açıq çağırışlar), 283-cü ( milli, irqi, sosial və ya dini nifrət və düşmənçiliyin salınması) və 220.2-ci (hakimiyyət nümayəndəsinin qanuni tələblərinə fəal şəkildə tabe olmamağa və kütləvi iğtişaşlara, habelə vətəndaşlara qarşı zorakılıq etməyə çağırışlar etmə) maddələri ilə ittiham olunur.