Xırdalanda keçmiş məhkum polislərə hücum çəkdi – ƏMƏLİYYAT

Xırdalan şəhərində quldurluq cinayəti baş verib.

Teleqraf.com xəbər verir ki, hadisə Qafqaz Universitetinin yaxınlığında yerləşən avtotəmir sexində qeydə alınıb.

Fərid Paşayevə məxsus “Range Rover” markalı avtomobil alqı-satqıdan öncə texniki baxışdan keçirmək məqsədi ilə avtotəmir sexinə gətirilib.

Təmir sexinin ustası, 1977-ci il təvəllüdlü Taleh Quliyev avtomobili idarə edərkən basqına məruz qalıb. Naməlum şəxs Taleh Quliyevi bıçaqla hədələyərək, avtomobili qaçırıb. Avtomobili qaçıran Abşeron rayon Mühafizə İdarəsinin əməkdaşları tərəfindən “Ər-Riyad” ticarət mərkəzinin qarşısında yaxalanıb.

Bu zaman maşın oğrusu bıçaqla polis əməkdaşlarına hücum edib. Tərk-silah edilən cinayətkar Abşeron rayon Polis İdarəsinə təhvil verilib.

Araşdırma zamanı məlum olub ki, cinayəti törədən Lənkəran şəhərində anadan olmuş və hazırda Sumqayıt şəhərində yaşayan, 1984-cü il təvəllüdlü İlqar Qurbanovdur. Onun əvvəllər Cinayət Məcəlləsinin müxtəlif maddələri ilə məhkum olunduğu bildirilir.

Faktla bağlı cinayət işi başlanıb.

Hacı Zeynalov