Bakıda əməliyyat: 25 kilodan çox narkotik müsadirə edildi

Bakı polisi narkotiklərlə bağlı xüsusi əməliyyat keçirib.

Teleqraf.com xəbər verir ki, Bakı şəhər Baş Polis İdarəsinin Narkotiklərlə Mübarizə İdarəsinin əməkdaşları tərəfindən keçirilən əməliyyat-axtarış tədbirləri nəticəsində Bakı şəhər sakini, 1979-cu il təvəllüdlü İsa Abdulbəyov Yusif Səfərov küçəsində, “Neftçilər” xəstəxanasının yaxınlığında saxlanılıb.

Onun üzərindən və idarə etdiyi “Tofaş” markalı maşından 0,738 qram narkotik vasitə olan tiryək və 25 kiloqram 217 qram narkotik vasitə olan qurudulmuş marixuana aşkar olunaraq götürülüb.

İsti izlərlə davam etdirilən əməliyyat-axtarış tədbirləri nəticəsində İsa Abdulbəyova tiryəki satan Abşeron rayon sakini, 1976-cı il təvəllüdlü Sadiq Novruzov da saxlanılıb. Onun üzərindən və əlindəki çantadan çəkisi 654 qram olan tiryək aşkar olunaraq götürülüb.

Sadiq Novruzov əvvəllər bir dəfə, İsa Abdulbəyov isə iki dəfə məhkumluq həyatı yaşayıb.

Faktla əlaqədar araşdırmalar davam edir.

Hacı Zeynalov