Çovdarov səhhətinin pisləşdiyini dedi, proses dayandırıldı - YENİLƏNDİ

Ləğv edilmiş Milli Təhlükəsizlik Nazirliyi (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov, MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə məhkəmə prosesi davam edib.

Teleqraf.com xəbər verir ki, Bakı Hərbi Məhkəməsinin hakimi Həbib Həsənovun sədrliyi ilə keçirilən prosesdə Cahangir Alışov ifadəsini davam etdirib.

Daha sonra Cahangir Alışov vəkillərin suallarına cavablandırıb. Bu zaman onun istintaqa verdiyi ifadəsi ilə məhkəmədə söylədikləri arasında bəzi ziddiyyətlər olub.

Bundan sonra həmin epizod üzrə bir neçə şahid ifadə verib. Onlar istintaqa verdikləri ifadələri təsdiq ediblər.

Prosesinin sonuna yaxın Akif Çovdarovun səhhətində problemlər yaranıb. O, məhkəmədə iştirak edə bilməyəcəyini deyib. Bunu nəzərə alan hakim prosesi davam etdirməyib.

Proses fevralın 22-də davam edəcək.

***

Sabunçu rayon Məhkəməsinin inzibati binasında ləğv edilmiş Milli Təhlükəsizlik Nazirliyi (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov, MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə məhkəmə prosesi davam edib.

Teleqraf.com xəbər verir ki, Bakı Hərbi Məhkəməsinin hakimi Həbib Həsənovun sədrliyi ilə keçirilən prosesdə zərərçəkmiş, "Yeni Yasamal" MTK-nın direktoru Cahangir Alışov ifadə verib.

Cahangir Alışov ifadəsində deyib ki, 2010-cu ilin may-iyun aylarında "Yeni Yasamal" MTK-nın icraçı rəhbəri Nadir Feyziyevlə ofisdə söhbət zamanı Nadir Feyziyev bildirib ki, onu və digər təsisçi Nəsib Əliyevi MTN-ə çağırıb, MTK-nın layihə-smeta sənədlərini istəyiblər.

Onlar da sənədlərin direktorda olduğunu deyiblər. Bu vaxt ona tanımadığı nömrədən zəng gəlib. Zəng edən şəxs “MTN əməkdaşıyam, adım Alıdır. Siz MTK-nın layihə-smeta sənədlərini götürüb MTN-ə Akif müəllimin yanına gəlməlisiniz” deyib. Cahangir Alışov səhərisi MTK-nın layihə-sənədlərini götürüb Nadir Feyziyevlə birlikdə MTN-nə gedib.

Cahangir Alışov bildirib ki, özünü Alı kimi təqdim edən MTN əməkdaşı ilə 2-ci mərtəbəyə qalxıblar: "Bu vaxt Nəsib Əliyevi və sonradan adlarının Elçin, Ceyhun və Rauf olduğunu öyrəndiyim şəxsləri dəhlizdə gördüm. Elçin, Ceyhun və Rauf Nəsib Əliyevin onlara borclu olduğunu iddia ediblər.

Sonra Alı və adını bilmədiyim daha 2 nəfər məni sorğu-suala tutdular. Əsasən sualları Alı verdi. Məndən Nəsib Əliyevin "Yeni Yasamal" MTK-da payının olub-olmadığını soruşdu. Dedim ki, MTK-da 33 faiz payı var. Alı “rəhbərliyin göstərişi var, Nəsib Əliyevin payına düşən bütün əmlak onların təqdim etdiyi şəxslərin adlarına rəsmiləşdirilməlidir” dedi. Alı mənə rəisi Akif Çovdarovun adından "rəhbərlik bilir, nə deyilirsə, onu da yazıb vermək lazımdır" söylədi.

Mən Alı və iki MTN əməkdaşına Nəsib Əliyevin payına düşən yaşayış və qeyri-yaşayış sahələrinin onun özü tərəfindən artıq müxtəlif vətəndaşlara satıldığını və pullarının alındığını bildirdim.

Həmin günün səhərisi saat 10-11 radələrində Alı zəng edib Akif Çovdarovun mənimlə görüşmək istədiyini dedi. MTN-nə getdim. Akif Çovdarovla onun otağında görüşdüm. Akif Çovdarov mənə dedi: "Get, sənədləri imzala, 500.000 manat pul verəcəksən, artıq problem yaratma, başa düşdün? Get nə deyirlər icra elə".

Mən Akif Çovdarova o qədər pulumun olmadığını dedim. O, isə əsəbi şəkildə "deyəsən, içəri girmək istəyirsən, get nə deyirəm onu da elə" dedi. Onun çox əsəbi olduğunu gördüm.

Həbs ediləcəyimdən qorxduğumdan heç nə deməyib otağı tərk etdim. 2-ci mərtəbəyə düşdüm. Artıq Alı Elçin, Rauf və Ceyhunun təqdim etdikləri şəxsiyyət vəsiqələri əsasında bizim inşa etdiyimiz binadan yaşayış və qeyri-yaşayış sahələrinin rəsmiləşdirilməsi barədə Nəsib Əliyev və Nadir Feyziyevə göstəriş vermişdi.

Nəsib Əliyevin borcuna uyğun yaşayış və qeyri-yaşayış sahələri verildikdən sonra Alı və digər iki əməkdaş "Akif Çovdarovun göstərişidir, bizə də həmin binadan mənzil verməlisiniz" dedi. Bundan sonra Alı bir neçə şəxsiyyət vəsiqəsini Nadir Feyziyevə verdi.

O, həmin şəxslərin adlarına yaşayış və qeyri-yaşayış sahələrini sənədləşdirdi, Nəsib Əliyevlə mən isə həmin sənədləri imzamızla təsdiq etdik. Beləliklə, həm mənim, həm də Nəsib Əliyevin imzaları ilə 19 mənzil, 4 qaraj, 3 qeyri-yaşayış sahəsi (market) və 1 zirzəmi həmin vətəndaşların adlarına yazılıb rəsmiləşdirilərək, ümumilikdə 27 müqavilə tərtib olundu. Həmin evlər isə bundan əvvəl başqa şəxslərə satılmış evlər idi, pulu da ödənmişdi”.

Cahangir Alışov daha sonra ifadəsində bildirib ki, MTK-nın icraçı direktoru Nadir Feyziyev 2 gün ərzində MTN-in nəzarət-buraxılış məntəqəsinin inzibati binasının 2-ci mərtəbəsində saxlanılıb. MTN-dən buraxıldığı gün Alı Akif Çovdarovun adından bildirib ki, Akif Çovdarovun dediyi 500.000 manat, "Yeni Yasamal" MTK-nın inşa etdiyi binadan isə 6 mənzil və 1 qeyri-yaşayış sahəsi də verilməlidir.

Cahangir Alışov bununla əlaqədar həmin günün səhərisi Nadir Feyziyevlə birlikdə MTN-ə gedib. O, Alıdan 500.000 manat, 6 mənzil və 1 qeyri-yaşayış sahəsinin onlardan hansı səbəbə tələb edildiyini soruşub.

Alı belə cavab verib: "Siz MTK işlədirsiniz, haqq vermirsiniz, rəhbərliyin göstərişdir, 500.000 manat pul, 6 mənzil və 1 qeyri-yaşayış sahəsi verməlisiniz". O isə Alıya və adlarını bilmədiyi digər 2 MTN əməkdaşına həmin məbləği verməyə imkanlarının olmadığını, cəmi 100 və ya 150 min manat verə biləcəklərini bildirib. Lakin onunla razılaşmayıblar. Onlar “bu bizim yox, rəhbərliyin tələbidir, rəhbərliyin dediyi məbləği verməsəniz, başınız ağrıyacaq” deyib, hədə-qorxu gəliblər.

Alı həmin gün Nadir Feyziyevlə bir daha görüşüb: “Nadir bildirdi ki, Alı 350.000 manat istəyib, rəhbərliyin həmin puldan az məbləğə razı olmadığını deyib. Mən Nəsibin başına açılan oyunun mənim də başıma açılacağından qorxub 6 mənzili, 1 qeyri-yaşayış sahəsini və 350.000 manatı verməyə razılaşdım. MTN əməkdaşları 6 vətəndaşın şəxsiyyət vəsiqələrinin surətini müxtəlif vaxtlarda Nadirə vermişdilər. Nadir isə onları MTK-ya gətirmişdi. Bundan sonra müqavilələr tərtib olundu və mən həmin müqavilələri öz imzamla təsdiq edib Nadir Feyziyevin vasitəsi ilə Alıya göndərdim.

350.000 manatı Alıya Nadir Feyziyev apardı. Pulu Alıya 3 dəfəyə göndərdim”.

Cahangir Alışov MTN əməkdaşlarının qanunsuz hərəkətləri barədə hüquq-mühafizə orqanlarına müraciət etmədiyini də deyib: “Buna səbəbi isə Akif Çovdarov və onun əməkdaşları tərəfindən mənə və ailə üzvlərimə qarşı təhlükə yaranacağından qorxmağım idi”.

Prosesdə fasilə elan olunandan sonra Akif Çovdarovun vəkilləri jurnalistlərə açıqlama verməkdən imtina ediblər. Ehtimal olunur ki, Akif Çovdarov vəkilləri nə mətbuatda danışmalarına qadağa qoyub.

Proses günün ikinci yarısında davam edəcək.

Hacı Zeynalov