Avtomobildən araq və siqaret aşkar edildi

Dövlət Gömrük Komitəsi Tovuz Gömrük İdarəsinin Gömrük hüquqpozmalarına qarşı mübarizə şöbəsinə "Mersedes Benz" markalı avtomobildə Azərbaycanın aksiz markası ilə markalanmayan araq və siqaretlərin olması barədə məlumat daxil olub.

Komitədən Teleqraf.com-a verilən məlumata görə, dərhal yaradılan əməliyyat qrupu həmin avtomobili Ağstafa rayonu ərazisində saxlayaraq Tovuz Gömrük İdarəsinin inzibati binasının həyətinə gətirib və nəqliyyat vasitəsinə gömrük baxışı keçirilib.

Yoxlama zamanı avtomobilin yük yerindən və ön ayaqaltılarının altından Azərbaycan Respublikasının aksiz markası ilə markalanmayan 111 ədəd 1.0 litrlik "Nemiroff" markalı araq, aksiz markası ilə markalanmayan 1800 ədəd "Marlboro Gold Edge", 600 ədəd "Marlboro Gold Touch" və 600 ədəd "Marlboro Filter Plus" markalı siqaret aşkar edilib.

Faktla bağlı araşdırma aparılır.

İlhamə ƏBÜLFƏT