Şit zarafat üstə bibisi oğlunu öldürdü və 18 il cəza aldı - HÖKM

Bu gün Bakı Ağır Cinayətlər Məhkəməsində qətldə təqsirli bilinən Cavidan Seyfullayevin cinayət işi üzrə məhkəmə başa çatıb.

Teleqraf.com xəbər verir ki, ötən il mayın 8-də Xətai rayonunun M.Hadi küçəsində naməlum şəxs Masallı rayon sakini Musa Nurullayevi bıçaqla qətlə yetirib.

Polis və prokurorluq orqanları əməkdaşlarının əməliyyat-axtarış və istintaq tədbirləri nəticəsində qətli törətmiş Masallı rayon sakini, əvvəllər məhkum olunmuş Cavidan Seyfullayev tutulub. Məlum olub ki, hadisədən əvvəl Cavidan Seyfullayev bibisi oğlu Musa Nurullayevlə kafelərdən birində yeyib-içib.

Daha sonra metronun qarşısında gəzişiblər. Sərxoş qohumların şit zarafatları biri-birlərinin xoşuna gəlməyib. Bu zaman Cavidan bıçaqla Musa Nurullayevi vurub.

Cavidan Seyfullayev Cinayət Məcəlləsinin 120.2.2-ci (xuliqanlıq niyyəti ilə adam öldürmə) maddəsi ilə ittiham olunub.

Hakim Rauf Əliyevin sədrliyi ilə keçən prosesdə təqsirləndirilən şəxsə hökm oxunub. Cavidan Seyfullayev 18 il müddətinə azadlıqdan məhrum edilib.

Hacı Zeynalov