19 İyul 2017 13:12
807

Terrorçuluq barədə bilə-bilə yalan məlumat verməkdə təqsirləndirilən Rahib Sahabovun cinayət işi üzrə məhkəmə prosesi keçirilib.

Teleqraf.xom xəbər verir ki, bu gün Bakı Ağır Cinayətlər Məhkəməsində hakim Şəkər Məmmədovanın sədrliyi ilə baş tutan prosesdə prokuror ittiham aktını elan edib.

İttihama görə, Rahib Sahabov 2016-cı ilin noyabr ayında Masazır qəsəbəsində yaşadığı evdən Daxili İşlər Nazirliyinin 102 xidmətinə zəng edib. O vəhhabi təriqəti üzvlərinin "20 Yanvar" metronstansiyasını partladacağını deyib.
Məlumatla bağlı müvafiq araşdırma aparılıb, lakin məlumat təsdiqini tapmayıb.

Keçirilən əməliyyat nəticəsində Rahib Salahov həbs edilib. O, Cinayət Məcəlləsinin 216-cı (terrorçuluq barədə bilə-bilə yalan məlumat vermək) maddəsi ilə ittiham edilir.

İttihama münasibət bildirən Rahib Salahov elan olunmuş ittiham üzrə özünü təqsirli bilib. O deyib ki, zəng vuran zaman içkili olub: "İçmişəm, "piyan" olmuşam. Hadisədən əvvəlki bir həftədə hər gün içirdim, qardaşım rəhmətə getmişdi. Peşmanam, nə dediyimi, niyə dediyimi də bilmədim".

Rahib Sahabov ifadə verən zaman hakimdən xahiş edib ki, onun barəsində hökm tez çıxarılsın: "Onsuz da özümü təqsirli bilirəm. Dərmanla yaşayıram, məhkəməyə gedib-gələ bilmirəm".

Növbəti proses iyulun 26-da davam edəcək.


Müəllif: Hacı Zeynalov