Qız söhbətinə görə dəhşətli qətl və – Ağır cəza

Sumqayıt şəhərində qətldə təqsirləndirilən 1988-ci il təvəllüdlü Teymur Sadıqovun cinayət işi üzrə məhkəmə prosesi başa çatıb.

Teleqraf.com xəbər verir ki, bu gün Bakı Ağır Cinayətlər Məhkəməsində hakim Əhməd Quliyevin sədrliyi ilə baş tutan prosesdə təqsirləndirilən şəxsə hökm oxunub.

Teymur Sadıqov 12 il müddətinə azadlıqdan məhrum edilib.

Qeyd edək ki, prokuror Teymur Sadıqovun 14 il müddətinə azadlıqdan məhrum olunmasını təklif etmişdi.

İttihama görə, hadisə bu il iyunun 27-də Sumqayıt şəhərində baş verib. Astara rayon sakini, əvvəllər məhkum olunmuş Taleh Babazadə bıçaq xəsarəti ilə xəstəxanaya gətirilib və orada ölüb.

Əməliyyat-axtarış tədbirləri nəticəsində hadisənin Gədəbəy rayon sakini Teymur Sadıqov tərəfindən münaqişə zəminində törədildiyi müəyyən edilib. O, Şəmkir rayonu ərazisində tutulub.

İlkin məlumatda bildirilib ki, Taleh Babazadə hadisə yerinə yollanmazdan əvvəl tanışlarından birinə qız söhbətinə getdiyini deyib.