Evlərin qənimi həbs olundu - Biləsuvarda

Biləsuvar rayon polis şöbəsinin əməliyyat tədbirləri nəticəsində evlərə pəncərədən daxil olaraq oğurluq etməkdə şübhəli bilinən şəxs saxlanılıb.

Daxili İşlər Nazirliyinin mətbuat xidmətindən Teleqraf.com-a verilən məlumata görə, saxlanılan Biləsuvar şəhər sakini Böyükxan Ağayevin ətrafında aparılmış tədbirlərlə müəyyən edilib ki, o, cari il mayın 10-da həmyerlisi Rəşad Rufullayevin şəhər ərazisindəki mənzilinə pəncərədən daxil olub, oradan 1000 manat pul, həmçinin qızıl üzük oğurlayıb.

Onun bir neçə gün sonra Ülvi Babayevin şəhər ərazisindəki evinə də eyni üsulla daxil olaraq 450 manat pul və 1500 manat dəyərində qızıl-zinət əşyaları oğurladığı məlum olub.

Davam edən əməliyyat-axtarış tədbirləri nəticəsində Böyükxan Ağayevin oktyabrın 10-da Biləsuvar rayonunun Bəydili kəndində bir evdən, bir həftə sonra isə Müşfiq Nəzərova məxsus digər bir evdən müxtəlif məişət əşyaları oğurladığı aşkarlanıb.

Əvvəllər də eyni əmələ görə məhkum olunmuş həmin şəxs saxlanılarkən oğurladığı əşyaların bir qismi ondan maddi sübut kimi götürülüb.

Faktla bağlı Biləsuvar RPŞ-nin İstintaq Bölməsində Cinayət Məcəlləsinin müvafiq maddəsi ilə cinayət işi başlanılıb.