İki böyük şəhərin oğruları tutuldu – DİN

Ötən gün polis orqanları tərəfindən həyata keçirilən əməliyyat tədbirləri nəticəsində silsilə oğurluq törədən şəxslər saxlanılıb.

Teleqraf.com xəbər verir ki, Sumqayıt şəhər Polis İdarəsi 4-cü polis bölməsi əməkdaşlarının əməliyyat tədbirləri nəticəsində oğurluq törətməkdə şübhəli bilinən şəhər sakini, əvvəllər məhkum olunmuş Ramin Məmmədov tutulub.

O, ötən ilin noyabr ayından cari il yanvarın 4-dək şəhər sakini olan 6 nəfərin pul, mobil telefon, kosmetik və geyim əşyalarını, habelə “VAZ-21041” markalı avtomobildən maqnitofon oğurlayıb.

Gəncənin Nizami rayon Polis İdarəsinin əməkdaşları tərəfindən ötən ilin dekabr ayından cari il yanvarın 21-dək olan müddətdə rayon ərazisində 5 evdən təmir-tikinti alətləri, inşaat materialları və məişət əşyaları, habelə 3 avtomobildən pul və akkumulyator oğurlamaqda şübhəli bilinən şəhər sakini Rövşən Nərimanov saxlanılıb.

Ötən ilin dekabrından cari il fevralın 1-dək olan müddətdə Gəncə şəhərində 5 mağazadan pul, noutbuk, tütün məmulatı, spirtli içki, danışıq kartı və ərzaq məhsulları oğurlanıb.

Oğurluğu törətməkdə şübhəli bilinən şəhər sakinləri, əvvəllər məhkum olunmuşlar - Muraz Əzizov və Rövşən Nağıyev isə Kəpəz Rayon Polis İdarəsinin əməkdaşları tərəfindən saxlanılıblar.

Qeyd olunan faktlarla bağlı cinayət işləri başlanıb.