Dağıstandan qayıdıb bərbərxanaya intiqama getdi – Təfərrüat

Mingəçevir şəhərində dəhşətli qətl törədən 1990-cı il təvəllüdlü Eldar Abbasovun cinayət işi üzrə məhkəmə prosesi başlayıb.

Teleqraf.com xəbər verir ki, Şəki Ağır Cinayətlər Məhkəməsində hakim Rəşid Hüseynovun sədrliyi ilə baş tutan prosesdə təqsirləndirilən şəxsin anket məlumatları dəqiqləşdirilib.

İttihama görə, qətl hadisəsi 2017-ci il, oktyabrın 22-də Mingəçevir şəhərindəki bərbərxanada baş verib.

Mingəçevir sakini olan və Dağıstandan yenicə qayıdan 1990-cı il təvəllüdlü Eldar Abbasov şəxsi münasibətlər zəminində 1983-cü il təvəllüdlü şəhər sakini Pərviz Məmmədova 18 bıçaq xəsarəti yetirərək onu amansızlıqla qətlə yetirib.

Eldar Abbasov hadisənin baş verdiyi bərbərxanada saxlanılıb və istintaqa təhvil veriblər. Hadisənin qısqanclıq zəminində törədildiyi məlum olub. Eldar Abbasovun subay olduğu, Pərviz Məmmədovun isə 2016-cı ildə evləndiyi və bir uşaq atası olduğu bildirilir.

Məlum olub ki, Pərviz Eldarın sevdiyi qadınla evlənib. Evlənmək üçün pul yığmaq məqsədilə Dağıstana işləməyə gedən Eldar bir müddət sonra Pərvizin onun sevdiyi qızı qaçıraraq evləndiyini eşidib.

Bundan sonra o, Pərvizlə görüşmək istəyib. Lakin 34 yaşlı Pərviz söhbətə ehtiyac olmadığını deyib. Bundan sonra Eldar Abbasov Pərvizin işlədiyi yerə gələrək ona 20-dən çox bıçaq zərbəsi endirib. Yaxınlıqdakı şəxslər onları ayıra bilməyib və yalnız hadisə yerinə gələn polislərin müdaxiləsindən sonra Pərvizi xəstəxanaya göndərmək mümkün olub. Lakin o, yolda keçinib.

İstintaq orqanı tərəfindən Eldar Abbasovun barəsində Cinayət Məcəlləsinin 120.1-ci (qəsdən adam öldürmə) maddəsi ilə ittiham elan edilib.

Növbəti proses fevralın 22-də davam edəcək.