Bakıda aptek müdiri tutuldu – Əməliyyat/Foto

Daxili işlər orqanlarının əməkdaşları tərəfindən insan orqanizminə ciddi zərər vuran, satışı müvafiq qanunvericiliyə əsasən qadağan olunan və yaxud məhdudlaşdırılan psixotrop tərkibli dərman preparatlarının alqı-satqısının qarşısının alınması istiqamətində növbəti əməliyyat tədbiri həyata keçirilib.

Teleqraf.com xəbər verir ki, Xətai rayon Polis İdarəsinin əməkdaşlarının əməliyyat-axtarış tədbiri nəticəsində Siyəzən rayon sakini, əvvəllər məhkum olunmuş Əli Babazadə üzərində psixotrop tərkibli dərman preparatları saxlamaqda şübhəli bilindiyi üçün saxlanılıb.

Hal şahidlərinin iştirakı ilə onun üzərində şəxsi axtarış keçirilən zaman 4 ədəd güclü təsiredici xassəyə malik "Preqabalin" həbləri aşkar olunaraq maddi sübut kimi götürülüb. Araşdırmalar zamanı Əli Babazadənin psixotrop tərkibli dərmanları Suraxanı rayonu, Yeni Günəşli qəsəbəsində yerləşən "Buta Aptek"dən 16 manata aldığı müəyyən edilib.

Əməliyyat tədbirlərinin davamı olaraq həmin aptekin sahibi, Bakı şəhər sakini Orxan Rəsulov da saxlanılaraq istintaqa təqdim edilib. Ona məxsus aptekə baxış keçirilən zaman obyektdən satışı qadağan edilən psixotrop tərkibli 7640 ədəd "Tramadol", 1 ədəd konvalyutada "Gabapentin" və 25 ədəd "Haloperidol-Richter" həbləri aşkar olunaraq götürülüb.

Qeyd edək ki, əməliyyat zamanı həmin aptekdən qanunsuz olaraq psixotrop tərkibli dərmanlar alan daha 6 nəfər də saxlanılaraq inzibati məsuliyyətə cəlb olunub.

Faktla bağlı Xətai rayon Polis İdarəsinin istintaq şöbəsində Cinayət Məcəlləsinin müvafiq maddəsi ilə cinayət işi başlanılıb, araşdırmalar davam etdirilir.