Dəhşətli yanğının günahkarı bəraət istədi – Qərar

Binəqədi rayonunda 16 mərtəbəli binada baş vermiş dəhşətli yanğınla bağlı həbs olunan Qlobal Stone MMC-nin təsisçisi və idarə heyətinin sədri Miryusif Mahmudovun kasasiya şikayəti üzrə məhkəmə prosesi başa çatıb.

Teleqraf.com xəbər verir ki, Ali Məhkəmədə hakim Fərhad Kərimovun sədrliyi ilə baş tutan prosesdə qərar elan edilib.

Qərara görə, təqsirləndirilən şəxsin bəraət hökmünün çıxarılması barədə kasasiya şikayəti təmin edilməyib.

Qeyd edək ki, Miryusif Mahmudovla birlikdə mühakimə olunan digər şəxslər Ali Məhkəməyə müraciət etməyiblər. Bu səbəbdən yalnız Miryusif Mahmudovun şikayəti üzrə kasasiya qaydasında şikayətə baxılıb.

Miryusif Mahmudov Bakı Ağır Cinayətlər Məhkəməsinin hökmü ilə 8 il müddətinə azadlıqdan məhrum edilib.

Onunla birlikdə mühakimə olunan Qlobal Stone MMC-nin baş direktoru Uğur Bəşirov 5 il, cəmiyyətin İdarə Heyətinin sədr müavini Ələkbər Əsgərov 4, Binəqədi Rayon İcra Hakimiyyəti başçısının sabiq birinci müavini Qəzənfər Novruzov 4, Binəqədi rayon Mənzil Kommunal Təsərrüfat Birliyinin rəisi işləmiş rayon İcra Hakimiyyətinin Təsərrüfat şöbəsinin sabiq müdiri Ədalət Rəcəbov 4, Binəqədi rayonu, 72 saylı Mənzil Kommunal İstismar Sahəsinin sabiq rəisi Nizami Orucov 3 il 6 ay müddətinə azadlıqdan məhrum olunub.

“Dərnəgül Boru Zavodu” Qapalı Səhmdar Cəmiyyətinin sınaq laboratoriyasının sabiq müdiri Ağacavad Məmmədov və Səhiyyə Nazirliyinin Gigiyena və Epidemiologiya Mərkəzinin sabiq baş direktoru Akif Əlibəyovun barəsində Cinayət Məcəlləsinin 70-ci (şərti məhkim etmə) maddəsi tətbiq edilib və onlar şərti cəza alıblar.

Birinci instansiya məhkəməsinin hökmündə qeyd olunub ki, yanğın zamanı dövlətə 8 milyon 750 min manat ziyan dəyib. Cinayət işi üzrə 3 nəfərin verdiyi mülki iddia baxılmamış saxlanılıb. Onlara izah edilib ki, yerli məhkəməyə mülki qaydada müraciət edə bilərlər.

Bakı Apelyasiya Məhkəməsinin qərarı ilə təqsirləndirilən şəxslərin barələrində bəraət hökmünün çıxarılması ilə bağlı apelyasiya şikayətləri təmin edilməyib.

İttihama görə, 2015-ci ilin mayın 19-da Binəqədi rayonu ərazisində, metronun “Azadlıq prospekti” stansiyasının yaxınlığında 16 mərtəbəli yaşayış binasında baş verən yanığında 15 nəfər həyatını itirib, 30 nəfərdən çox şəxs xəsarət alıb.

Baş verən yanğın hadisəsini araşdıran prokurorluq təqsirləndirilən şəxsləri təqsirli bilib və onların barəsində rəsmi ittiham elan edilib.