11 İyun 14:34

Lənkəran şəhərində qəsdən adam öldürməyə cəhddə təqsirli bilinən 1968-ci il təvəllüdlü Sabit Heydərlinin cinayət işi üzrə məhkəmə prosesi başa çatıb.

Teleqraf.com xəbər verir ki, Sabit Heydərli öz atası Midaris Heydərov və qardaşı Mahir Heydərov ilə birlikdə yaşadığı Lənkəran şəhəri, Axundzadə küçəsi 25 saylı ünvanda yerləşən, mərhum anası Zərintacın adına qeydiyyata alınmış, atasının faktiki mülkiyyətində olan birmərtəbəli fərdi yaşayış evini gələcəkdə öz adına keçirmək qərarına gəlib.

Sabit Heydərli bu barədə eyni evdə birlikdə yaşadıqları dövrdə bir neçə dəfə atası və qardaşına bildirib, atasından həmin evin onun adına rəsmiləşdirilməsini tələb edib.

Lakin Midaris və Mahir onun bu fikrinə qəti etiraz edib, razılaşmayıblar. Bu zəmində onların arasında dəfələrlə münaqişələr olub.

Bu mübahisələr zamanı Sabit Heydərli atası və qardaşını öldürüb, evi ələ keçirəcəyini bildirib.

Sabit Heydərli 16 oktyabr 2016-cı il tarixdə, saat 10 radələrində yaşadığı evdə qardaşı Mahir Heydərov və atası Midaris Heydərovla növbəti dəfə əmlak tələbi ilə mübahisə edib. O, qəsdən yaratdığı münaqişə zamanı atasını və qardaşını öldürməklə əmlakı ələ keçirmək qərarına gəlib.

Bu niyyətlə bıçaqla əvvəlcə qardaşı Mahir Heydərovun bədəninin müxtəlif nahiyələrinə 4 zərbə vurub.

Vəziyyətin belə yarandığını görən Midaris Heydərov evin eyvanından qaçıb. Sabit atasını təqib edərək, küçədə ona çatıb. Küçədə atasının boyun, alt çənə və sol qulaq nahiyələrinə zərbələr endirib.

Cinayəti törədən Sabit Heydərli hadisə yerindən qaçıb. Hər iki yaralı xəstəxanaya çatdırılıb, onlara vaxtında tibbi yardım göstərildiyi üçün həyatlarını xilas etmək mümkün olub.

İstintaq orqanı tərəfindən Sabit Heydərlinin barəsində Cinayət Məcəlləsinin 29,120.2.5-ci (tamah məqsədi ilə və ya sifarişlə, habelə zərərçəkmiş şəxsin orqanlarından və ya toxumalarından istifadə etmək məqsədi ilə adam öldürməyə cəhd) və 29,120.2.7-ci (iki və ya daha çox şəxsi öldürməyə cəhd) maddələri ilə ittiham elan edilib.

Lənkəran Ağır Cinayətlər Məhkəməsinin hökmü ilə Sabit Heydərli 14 il müddətinə azadlıqdan məhrum edilib.

Hökmdən narazı qalan Sabit Heydərli apelyasiya şikayəti verib. O, qeyd edib ki, barəsində verilən ittiham qanunsuz və əsassızdır. Təqsirləndirilən şəxs işinə baxılması üçün yenidən prokurorluğa qaytarılmasını istəyib.

Sabit Heydərlinin şikayəti araşdırılması üçün Şirvan Apelyasiya Məhkəməsinə göndərilib. Şikayət hakim Rafiq Cəfərovun sədrlik etdiyi kollegiyada araşdırılıb.

Apelyasiya şikayətinin dəlillərini araşdıran hakim heyəti sonda qərar elan edib.

Qərara görə, Sabit Heydərlinin şikayəti təmin edilməyib.


Müəllif: Hacı Zeynalov
Загрузка...