Ginekoloqu öldürən polislə bağlı – Yeni xəbər

Bakıda 2 saylı Doğum Evinin həkim-ginekoloqu Natəvan Əliyevanın qətlində ittiham olunan keçmiş həyat yoldaşı Samir Əliyev kasasiya şikayəti verib.

Teleqraf.com xəbər verir ki, sabiq polis əməkdaşı olan Samir Əliyevin barəsində bəraət hökmünün çıxarılması barədə verdiyi kasasiya şikayəti Ali Məhkəməyə daxil olub.

Şikayət araşdırılması üçün hakim Əli Seyfəliyevin icraatına verilib.

Məhkəmə baxışı avqustun 1-nə təyin edilib.

Qeyd edək ki, Samir Əliyevin barəsində olan qərardan bir müddət əvvəl Baş Prokurorluq kasasiya protesti vermişdi. Bir müddət əvvəl Ali Məhkəmədə hakim Gülzar Rzayevanın sədrliyi ilə baş tutan iclasda Samir Əliyevin cəzasının ağırlaşdırılması ilə bağlı prokurorluğun protesti təmin edilməyib.

Qeyd edək ki, Bakı Apelyasiya Məhkəməsinin qərarı ilə Samir Əliyevin barəsində olan hökm dəyişdirilib.

Samir Əliyevin ittiham olunduğu Cinayət Məcəlləsinin 29,120.2.2, 29,120.2.4, 29,120.2.5, 29,120.2.9, 29,120.2.10-cu (xuliqanlıq niyyəti ilə, xüsusi amansızlıqla və ya ümumi təhlükəli üsulla, tamah məqsədi ilə və ya sifarişlə, habelə zərərçəkmiş şəxsin orqanlarından və ya toxumalarından istifadə etmək məqsədi ilə, təqsirkar şəxs üçün aşkar surətdə köməksiz vəziyyətdə olan adamı öldürmə, habelə adam oğurluğu və ya girov götürülməsi ilə bağlı və təkrar adam öldürməyə cəhd) maddələri həmin məcəllənin 125-ci (özünü öldürmə həddinə çatdırma) maddəsinə tövsif edilib.

Cinayət Məcəlləsinin 178.3.2-ci (dələduzluq, külli miqdarda ziyan vurmaqla törədildikdə) maddəsinə isə müddətin başa çatması ilə əlaqədar olaraq, xitam verilib.

Məhkəmə Samir Əliyevin cəzasından 1 il çıxıb və ona qəti olaraq 19 il müddətinə azadlıqdan məhrum etmə cəzası təyin edib.

Bakı Ağır Cinayətlər Məhkəməsinin hökmü ilə Samir Əliyev 20 il müddətinə azadlıqdan məhrum edilmişdi. O, hökmdən apelyasiya şikayəti vermişdi və barəsində bəraət hökmünün çıxarılmasını istəmişdi.

İstintaq orqanı Samir Əliyevi Cinayət Məcəlləsinin 29,120.2.2, 29,120.2.4, 29,120.2.5, 29,120.2.9, 29,120.2.10-cu (xuliqanlıq niyyəti ilə, xüsusi amansızlıqla və ya ümumi təhlükəli üsulla, tamah məqsədi ilə və ya sifarişlə, habelə zərərçəkmiş şəxsin orqanlarından və ya toxumalarından istifadə etmək məqsədi ilə, təqsirkar şəxs üçün aşkar surətdə köməksiz vəziyyətdə olan adamı öldürmə, habelə adam oğurluğu və ya girov götürülməsi ilə bağlı və təkrar adam öldürməyə cəhd), 120.2.1, 120.2.2, 120.2.4, 120.2.10-cu (bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən, xuliqanlıq niyyəti ilə, xüsusi amansızlıqla və ya ümumi təhlükəli üsulla və təkrar adam öldürmə), 144-1.2.2-ci (insan alveri), 145.2.4-cü (bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən qanunsuz azadlıqdan məhrum etmə), 178.3.2-cü (dələduzluq, külli miqdarda ziyan vurmaqla törədildikdə), 182.3.2-ci (külli miqdarda əmlak əldə etmək məqsədi ilə hədə-qorxu yolu ilə tələb etmə) və 309.2-ci (vəzifə səlahiyyətlərini aşma) maddələri ilə ittiham verilib.

İttihama görə, 2015-ci il iyulun 6-da gecə saatlarında Bakı-Quba yolunun 55-ci kilometrliyində yandırılmış qadın meyiti tapılıb. Meyitin Bakı sakini, 1981-ci il təvəllüdlü Natəvan Əliyeva olduğu müəyyən edilib.

Meyit tapılandan bir neçə gün sonra Natəvan Əliyevanın keçmiş həyat yoldaşı, sabiq polis əməkdaşı Samir Əliyev şübhəli şəxs kimi saxlanılaraq istintaqa cəlb olunub.