İş adamı MTN polkovnikindən Ali Məhkəməyə şikayət etdi

Ləğv edilmiş Milli Təhlükəsizlik Nazirliyi (MTN) Baş Əks-Kəşfiyyat İdarəsinin sabiq şöbə rəisi, polkovnik Mirəziz Əsgərovun barəsində yenidən kasasiya şikayəti verib.

Teleqraf.com xəbər verir ki, Mirəziz Əsgərovun cinayət işində zərərçəkmiş şəxs qismində tanınan iş adamı Vidadi Əziz tərəfindən kasasiya şikayəti verilib.

Vidadi Əziz kasasiya şikayətində mülki iddiasının təmin olunmasını istəyib. O, həmçinin Mirəziz Əsgərovun cəzasının ağırlaşdırılmasını tələb edib.

Vidadi Əzizin şikayəti araşdırılması üçün Ali Məhkəmənin hakimi Əziz Seyidovun icraatına verilib.

Məhkəmə baxışı dekabrın 13-nə təyin olunub.

Qeyd edək ki, bundan əvvəl də Vidadi Əziz eyni tələblə kasasiya şikayəti versə də, məhkəmənin gedişi dövründə şikayətini geri götürməsi barədə vəsatət verib.

Həmin dövrdə işə baxan hakim İlqar Qılıcov Vidadi Əzizin şikayətini geri götürməsi barədə vəsatətini təmin edib, işin baxışdan çıxarılması barədə qərar qəbul edib.

Həmin hakim kollegiyası Mirəziz Əsgərovun bəraət istəməsi barədə kasasiya şikayətini isə təmin etməyib.

Qeyd edək ki, Bakı Apelyasiya Məhkəməsinin qərarı ilə Mirəziz Əsgərovun 4 il müddətinə azadlıqdan məhrum etmə cəzası 3 ilə endirilib.

Zərərçəkmiş Vidadi Əzizovun apelyasiya şikayəti təmin edilməyib.

Bakı Hərbi Məhkəməsinin hökmü ilə Mirəziz Əsgərov 4 il müddətinə azadlıqdan məhrum edilib. O, 1 il 6 ay rəhbər vəzifə tuta bilməz. Hökmə əsasən, zərərçəkmişin mülki iddiası rədd edilib.

Təqsirləndirilən şəxsin üzərinə həbs qoyulmuş əmlakı və evindən götürülmüş pul Mirəziz Əsgərovun özünə qaytarılması barədə qərar qəbul edilib.

Mirəziz Əsgərovun özü də məhkəmə hökmündən apelyasiya şikayəti verib. O, günahsız olduğunu, Vidadi Əziz tərəfindən şərlənməsi nəticəsində həbs edildiyini qeyd edib, barəsində bəraət hökmünün çıxarılmasını istəyib.

Həmçinin hökmündən apelyasiya şikayəti verən zərərçəkmiş iş adamı Vidadi Əziz təqsirləndirilən Mirəziz Əsgərovun cəzasının ağırlaşdırılmasını istəyib.

İş adamı Mirəziz Əsgərova qarşı 193 min manat, Azərbaycan dövlətinə qarşı 1 milyon 200 min manat mülki iddiasının təmin olunmasını tələb edib.

Qeyd edək ki, birinci instansiya məhkəməsində çıxış edən prokuror Mirəziz Əsgərovun 2 il rəhbər vəzifə tutmaq hüququnu itirməklə 5 il müddətinə azadlıqdan məhrum edilməsini istəmişdi. Dövlət ittihamçısı Vüqar Quliyev söyləmişdi ki, zərərçəkmiş Vidadi Əziz Azərbaycan dövlətinə qarşı 1 milyon 200 min manat və Mirəziz Əsgərova qarşı isə 193 min manatlıq mülki iddia qaldırıb: “Zərərçəkmiş dövlətə qarşı iddiasını əsaslandıra bilməyib.

Qeyd edib ki, vəzifəli şəxs ona qarşı cinayət törədibsə, dövlət məsuliyyət daşıyır. Vidadi Əzizə qarşı 2012-ci ildə cinayət törədilib və bu müddət ərzində müvafiq qurumlara müraciət etməyib. Yalnız 2015-ci ildə rəsmi müraciət edib.

Vətəndaşın şikayəti ilə bağlı ciddi tədbir görülüb. Buna görə də onun dövlətə qarşı mülki iddiası tam rədd edilməli, Mirəziz Əsgərova qarşı iddiası isə baxılmamış saxlanılmalıdır”.

Prokuror əlavə edib ki, Mirəziz Əsgərovun üzərinə həbs qoyulmuş əmlakları ilə bağlı tədbirin görülməsi məhkəmənin mülahizəsinə buraxılsın.

İttihama görə, Mirəziz Əsgərov Vidadi Əzizovu İran və digər dövlətlərin xüsusi xidmət orqanları ilə əməkdaşlıqda günahlandıraraq həbs edib. Ondan hədə-qorxu yolu 500 min manat alıb. Bundan sonra Vidadi Əzizov sərbəst buraxılıb.

Daha sonra Mirəziz Əsgərov Vidadi Əzizin sahibkarlıq fəaliyyətinə mane olmamaq üçün 100 min dollar tələb, amma son nəticədə 40 min manat alıb.

Mirəziz Əsgərov Cinayət Məcəlləsinin 182.3.1, 182.3.2-ci (mütəşəkkil dəstə tərəfindən, külli miqdarda əmlak əldə etmək məqsədi ilə hədə-qorxu gəlmə), 311.3.1, 311.3.2, 311.3.3, 311.3.4-cü (qabaqcadan əlbir olan bir qrup şəxs və ya mütəşəkkil dəstə tərəfindən, təkrar, külli miqdarda, hədə-qorxu tətbiq olunmaqla rüşvət alma), 341.2.1 və 341.2.3-cü (bir qrup şəxs tərəfindən, ağır nəticələrə səbəb olmaqla hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə) maddələri ilə ittiham edilib.