19 Fevral 2019 13:12
650
12 Punto 14 Punto 16 Punto 18 Punto

Bakıda dələduzluqda təqsirləndirilən Orxan Mehrəliyevin cinayət işi üzrə məhkəmə prosesi keçirilib.

Teleqraf.com xəbər verir ki, bu gün Bakı Ağır Cinayətlər Məhkəməsində hakim Səbuhi Hüseynovun sədrliyi ilə baş tutan prosesdə müğənni Abbas Bağırovun məhkəməyə ərizə göndərdiyi məlum olub.

Müğənni ona dəymiş zərərin ödənildiyini, Orxan Mirəliyevdən şikayətçi olmadığını qeyd edib. O, özünün iştirakı olmadan məhkəmə iclasının davam etdirilməsini xahiş edib.

Növbəti proses martın 5-də davam edəcək.

İttihama görə, Orxan Mirəliyev köməkçisi olduğu tanınmış müğənni Abbas Bağırovun Bakı şəhər Yasamal rayonunda Şahbazi küçəsi, 99 nömrəli binanın həyətində yerləşən və dəyəri 35 min manat olan 28 kvadratmetr torpaq sahəsini ələ keçirib.

Həmin torpaq sahəsini Emil Qurbanova satacağını vəd edərək ondan 10 min manat alıb.

Bundan başqa o, Ümumdünya Azərbaycan Konqresinin hüquqşünası Xətai Yusubovdan 52 min 500 manat alaraq onu Müdafiə Nazirliyinin Hüquq şöbəsinin rəis müavini vəzifəsinə təyin etdirəcəyini vəd edib.

Maman Nadirovdan isə 2017-ci ildə 3500 manat alaraq onun cinayət işinə xitam verdirəcəyini vəd edib.


Müəllif: Hacı Zeynalov