Üç rayonda xüsusi əməliyyat: 4 həbs

Yasamal rayon Polis İdarəsi Narkotiklərlə Mübarizə Bölməsi və 27-ci polis bölməsi əməkdaşları narkotik vasitələrin alqı-satqısı ilə məşğul olan şəxslərin aşkar edilməsi istiqamətində növbəti uğurlu əməliyyat tədbiri həyata keçirib.

Teleqraf.com xəbər verir ki, əməliyyat zamanı Yasamal rayon sakini Çingiz Hacıyev saxlanılaraq istintaqa təqdim edilib.

Onun Yasamal rayonu ərazisində yerləşən mənzilinə baxış zamanı ümümi çəkisi 1 kiloqram 790 qram olan narkotik vasitə heroin aşkar edilərək götürülüb.

Evdən əlavə olaraq satış üçün nəzərdə tutulan 5 büküm narkotik vasitə olan heroin aşkar edilib.

Saxlanılan şəxs narkotik vasitəni satmaq məqsədi ilə şəxsiyyəti istintaqa məlum olmayan mənbədən aldığını bildirib.

Faktla bağlı saxlanılan şəxs barəsində Cinayət Məcəlləsinin müvafiq maddəsi ilə cinayət işi başlanılıb və barəsində Yasamal rayon Məhkəməsinin qərarı ilə həbs qətimkan tədbiri seçilib.

Daha iki əməliyyat Astara rayonunda keçirilib.

Astara rayon polis şöbəsinin əməkdaşlarının keçirdikləri növbəti uğurlu əməliyyat tədbirləri zamanı 5,7 kiloqramdan artıq narkotik vasitə aşkarlanaraq qanunsuz dövriyyədən çıxarılıb.

Polis əməkdaşlarının rayonun Sərək kəndi ərazisində keçirdikləri əməliyyat tədbirləri nəticəsində həmin kənd sakini Fərhad Əliyev 29 qram narkotik vasitə olan qurudulmuş marixuananı satarkən cinayət başında saxlanılıb.

Əməliyyat tədbirlərinin davamı olaraq onun yaşadığı evə keçirilən baxış zamanı yaşayış evinin saxlanc otağından çəkisi 5 kiloqram olan qurudulmuş marixuana, aşkar edilib.

Daha sonra, evin həyətində torpağa basıdırılmış 2 ədəd 3 litlik şüşə qabda ümumi çəkisi 548 qram olan qurudulmuş marixuana aşkarlanaraq götürülüb.

Bundan başqa, Astara rayon polis şöbəsi əməkdaşlarının keçirdikləri əməliyyat tədbiri nəticəsində Sərək kənd sakini R.İsmayılova narkotik vasitə satmaqda şübhəli bilinən həmkəndlisi F.Əliyev saxlanılıb.

Şəxsi axtarış zamanı ondan 30 qram marixuana aşkar edilib.

Davam etdirilən əməliyyat-axtarış tədbirləri ilə F.Əliyevin yaşadığı evdən isə əlavə olaraq 5,6 kiloqrama yaxın marixuana aşkar edilərək götürülüb.

İsmayıllı rayon polis şöbəsi əməkdaşlarının daxil olmuş məlumat əsasında keçirdikləri əməliyyat-axtarış tədbirləri nəticəsində Qalıncaq kənd sakini M.Əzimovun evindən 1,5 kiloqrama yaxın marixuana aşkar edilərək götürülüb.