Beynəlxalq Bankın milyonlarını mənimsəyənə cəza istənildi

Beynəlxalq Bankın külli miqdarda pulunu mənimsəməkdə təqsirləndirilən Rauf Allahverdiyevin cinayət işi üzrə məhkəmə prosesi keçirilib.

Teleqraf.com xəbər verir ki, bu gün Bakı Ağır Cinayətlər Məhkəməsində hakim Zeynal Ağayevin sədrliyi ilə baş tutan prosesdə prokuror çıxış edib.

O, Rauf Allahverdiyevin 11 il müddətinə azadlıqdan məhrum edilməsini istəyib.

Növbəti proses martın 14-də davam edəcək.

İttihama görə, iş adamı Rauf Allahverdiyev Azərbaycan Beynəlxalq Bankının Moskva filialından 15 milyon manat kredit götürüb. Lakin krediti qaytarmayıb.

Məlum olub ki, Rauf Allahverdiyev Rusiya Federasiyasında “Roma S Kompaniya A” şirkətini təsis edib. Bundan sonra o, şirkətin inkişafı məqsədi ilə maliyyə cəlb etməyə çalışıb.

Rauf Allahverdiyev adını dəyişərək, özünü Rail Yusifov kimi təqdim edib və Rusiyada Yelena Akturiçlə əlbir olub, qanunsuz sənəd hazırlayaraq “Azərbaycan Beynəlxalq Bankı”nın Moskva filialından ayrı-ayrı vaxtlarda 866 min 566 manat, 338 min manat, 3 milyon 400 min manat və sair olmaqla, ümumilikdə 15 milyon manat pulu mənimsəyib.

Götürülən pullar Rauf Allahverdiyevin təsis etdiyi “Roma S Kompaniya A” şirkətinin hesabına köçürülüb.

Bundan başqa, o, Rusiya Federasiyası ərazisində cinayət törətdiyinə görə istintaqdan gizlənmək məqsədi ilə Azərbaycana qanunsuz yolla qaçmağa cəhd edib. Həsən Quliyevin adına rəsmi sənəd hesab edilən Azərbaycan Respublikasına Qayıdış Şəhadətnaməsini saxtalaşdırıb.

Lakin Rauf Allahverdiyev Qusar rayonunda yerləşən “Samur” Sərhəd Nəzarəti məntəqəsində sənədi saxta olduğu üçün saxlanılıb.

Rauf Allahverdiyevin barəsində Cinayət Məcəlləsinin 179.3.2-ci (külli miqdarda mənimsəmə) maddəsi ilə ittiham elan edilib.