Həbsdə olan şairin cəzası azaldıldı - Qərar

Dələduzluqda təqsirləndirilən Əli Ağaevli və Fuad Kərimovun barəsində olan hökmdən verilmiş apelyasiya şikayəti üzrə məhkəmə prosesi başa çatıb.

Teleqraf.com xəbər verir ki, Bakı Apelyasiya Məhkəməsində hakim Rəşad Abdulovun sədrliyi ilə baş tutan prosesdə qərar elan edilib.

Bakı Ağır Cinayətlər Məhkəməsinin hökm dəyişdirilib. Təqsirləndirilən şəxslərin hər ikisinin cəzası azaldılıb, onların hər birinə 1 il müddətinə azadlıqdan məhrumetmə cəzası saxlanılıb.

İttihama görə, cinayət işi üzrə zərərçəkmiş qismində Qabil Mehdiyev tanınıb. Hər iki təqsirləndirilən şəxs ona qarşı 500 min manata yaxın dələduzluq etməkdə ittiham olunub. Təqsirləndirilən şəxslər ziyanı tam ödəyib.

Bakı Ağır Cinayətlər Məhkəməsinin hökmü ilə Fuad Kərimov 5 il və Əli Ağaevli isə 7 il müddətinə azadlıqdan məhrum edilib.

“Hüquq, İqtisadiyyat və Sosial Tədqiqatlar” İnistitutunun direktoru, Dünya Azərbaycanlıları Konqresi (DAK) Məşvərət Məclisi sədrinin birinci müavini, sülh səfiri olmuş Əli Ağaevli 2010-cu və 2015-ci illərdə Vətəndaş Həmrəyliyi Partiyası (VHP) Siyasi Şurası tərəfindən 34 saylı Xətai ikinci seçki dairəsindən deputatlığa namizədliyi irəli sürüb.

O, həmçinin 2013-cü ildə “Yeni İslahatçılar” Təşəbbüs Qrupu tərəfindən prezidentliyə namizədliyini irəli sürüb, lakin sonradan Mərkəzi Seçki Komissiyasında ərizəsini geri götürüb.

Əli Ağaevli həmçinin şairdir və bir neçə kitabın müəllifidir.