Narkotikin təsiri altında avtomol idarə edən sürücü saxlanıldı - Foto

Astara rayon polis şöbəsinin dövlət yol polisi bölməsinin əməkdaşları tərəfindən güclü təsiredici narkotik vasitənin təsiri altında sərnişin daşıyan sürücü saxlanılıb.

Daxili İşlər Nazirliyinin mətbuat xidmətinin Lənkəran regional qrupundan Teleqraf.com-a verilən məlumata görə, onun idarə etdiyi avtomobildə narkotik vasitə aşkar edilib.

Xəbərə görə, taksi qismində idarə etdiyi “Tofaş” markalı avtomobillə Bakıdan Astaraya sərnişin aparan Bakı şəhəri, Bülbülə qəsəbəsinin sakini Əvəz Abbasov təhlükəsizlik kəmərindən istifadə etmədiyi üçün Astara şəhəri ərazisində dövlət yol polisi əməkdaşları tərəfindən saxlanılıb.

Bu zaman nəqliyyat vasitəsini idarə etmək üçün ona verilən etibarnamənin vaxtının bitdiyi, avtomaşının isə texniki baxışdan keçmədiyi müəyyən edilib.

Həmçinin hərəkətləri şübhə doğurduğu üçün o, tibbi müayinəyə dəvət edilib.

Əvəz Abbasovun avtomobili narkotik vasitənin təsiri altında idarə etdiyi məlum olub.

Polis əməkdaşları tərəfindən keçirilən baxış zamanı onun idarə etdiyi avtomobildən də narkotik vasitə və bir ədəd şpris aşkar edilərək götürülüb.

Faktla bağlı araşdırma aparılır.