Polis iki rayonda əməliyyat keçirdi: Həbs olunanlar var

Zaqatalada narkotik alverçisi saxlanılıb

Daxili İşlər Nazirliyinin mətbuat xidmətinin Şəki regional qrupundan Teleqraf.com-a verilən məlumata görə, Zaqatala rayon polis şöbəsinin əməkdaşları tərəfindən narkotik vasitələrin qanunsuz dövriyyəsi, onların satışı ilə məşğul olan şəxslərə qarşı növbəti uğurlu əməliyyat tədbiri həyata keçirilib.

Belə ki, polis əməkdaşlarının əldə edilmiş məlumat əsasında keçirdikləri əməliyyat tədbirləri nəticəsində narkotik vasitələrin saxlanılması və onun satışı ilə məşğul olan Zaqatala şəhər sakini, əvvəllər də narkotik vasitələrin qanunsuz dövriyyəsinə görə məhkum olunmuş 42 yaşlı Rəşad Hünərbəri saxlanılıb.

Qanunvericiliklə müəyyən edilmiş qaydada onun yaşadığı evə baxış keçirilən zaman oradan ümumi təmiz çəkisi 62,27 qram heroin aşkar olunaraq götürülüb.

Bundan başqa, Daxili İşlər Nazirliyinin mətbuat xidmətinin Lənkəran regional qrupunun yaydığı məlumata görə, Astara Rayon Polis Şöbəsinin əməkdaşlarının daxil olmuş məlumat əsasında keçirdikləri əməliyyat-axtarış tədbirləri nəticəsində rayonun Şahağacı kənd zakini Elzamin Feyruzzadə 1 bükümdə çəkisi 0,2 qram psixatrop maddə olan metamfetamini satarkən cinayət başında saxlanılıb.

Onun üzərinə keçirilən baxış zamanı əlavə olaraq satış məqsədi ilə saxladığı 11 büküm metamfetamin aşkarlanaraq götürülüb. Davam edən əməliyyat tədbirləri nəticəsində müəyyən edilmişdir ki, E.Feyruzzadə həmin psixatrop maddəni həmkəndlisi, əvvəllər məhkum olunmuş Həbib Muxtarovdan əldə edib.

H. Muxtarov polis əməkdaşları tərəfindən Şahağacı kəndi ərazisində saxlanılıb və üzərinə keçirilən baxış zamanı satış məqsədilə üzərində gəzdirdiyi 13 bükümdə psixatrop maddə olan metamfetamin aşkarlanaraq götürülüb.