Polis 7 rayonda əməliyyat keçirdi: Həbs olunanlar var

Masallı rayonunda narkotiklərlə bağlı əməliyyat keçirilib.

Teleqraf.com xəbər verir ki, Masallı rayon polis şöbəsi əməkdaşlarının əldə edilmiş məlumat əsasında keçirdikləri əməliyyat tədbiri nəticəsində narkotiklərin qanunsuz dövriyyəsində şübhəli bilinən Təzə Alvadı kənd sakini, əvvəllər məhkum olunmuş B.Feyzullayev saxlanılıb.

Şəxsi axtarış zamanı ondan 2 qramdan artıq marixuana aşkar edilərək götürülüb.

Davam etdirilən tədbirlərlə onun həyətyanı sahəsindən əlavə olaraq 24 qrama yaxın marixuana, nömrəsi silinmiş “TOZ-16” markalı tüfəng və 24 ədəd patron aşkar edilərək götürülüb.

Bundan başqa, Neftçala rayon polis şöbəsi əməkdaşlarının keçirdikləri əməliyyat-axtarış tədbirləri nəticəsində müxtəlif vaxtlarda rayon ərazisindəki 3 evdən pul, geyim və məişət əşyaları oğurlamaqda şübhəli bilinən Neftçala şəhər sakini, əvvəllər məhkum olunmuş T.Məmmədov saxlanılıb.

Ətrafında aparılmış tədbirlərlə onun 2 mağazadan ümimilikdə 1150 manat oğurlaması da müəyyən edilib.

Daha bir əməliyyat Hacıqabul rayonda keçirilib.

Hacıqabul rayon polis şöbəsi əməkdaşlarının əldə edilmiş məlumat əsasında keçirdikləri əməliyyat-axtarış tədbirləri nəticəsində şəhər sakini İ.Səttarovdan müvafiq sənədləri olmayan “İJ-16” markalı ov tüfəngi götürülüb.

Oxşar əməlyyat Xızı rayonunda da keçirilib.

Xızı rayon polis şöbəsi əməkdaşlarının əldə edilmiş məlumat əsasında keçirdikləri əməliyyat tədbiri nəticəsində narkotiklərin qanunsuz dövriyyəsində şübhəli bilinən Şoraabad qəsəbə sakini M.Rzayev saxlanılıb.

Şəxsi axtarış zamanı ondan heroin, habelə lüləsi və qundağı kəsilmiş “ZK” markalı ov tüfəngi və 5 ədəd patron aşkar edilərək götürülüb.

Oğurluq etdiyinə görə tutulmuş S.Pənahovun ətrafında Nərimanov rayon Polis İdarəsinin 18-ci polis şöbəsi əməkdaşları tərəfindən aparılmış əməliyyat tədbirləri ilə onun rayon ərazisindəki 2 mağazadan ümumilikdə 360 manat və 2 ədəd ətir oğurlaması müəyyən edilib.

Daha bir cinayətin üstü Gəncənin Kəpəz rayonunda açılması təmin olunub.

Kəpəz rayon Polis İdarəsi əməkdaşlarının keçirdikləri əməliyyat-axtarış tədbirləri nəticəsində rayon ərazisindəki 4 həyətyanı sahədən su mühərriki oğurlamaqda şübhəli bilinən Gülüstan qəsəbə sakini Y.Ələsgərov saxlanılıb.