Bakının üç rayonunda əməliyyat: 6 həbs

Bakının Binəqədi rayonunda oğurluq edən şəxslərin tutulması üçün əməliyyat keçirilib.

Teleqraf.com xəbər verir ki, Binəqədi rayon Polis İdarəsinin 43-cü polis bölməsi əməkdaşlarının keçirdikləri əməliyyat-axtarış tədbirləri nəticəsində fevralın 18-də rayon ərazisindəki həyətlərin birindən velosiped və avtomobilə aid 4 təkər oğurlamaqda şübhəli bilinən Abşeron rayon sakinləri E.Ələkbərli və əvvəllər məhkum olunmuş İ.Quliyev saxlanılıblar.

6-cı polis bölməsi əməkdaşlarının keçirdikləri əməliyyat tədbirləri nəticəsində fevralın 24-də və 27-də rayon ərazisindəki 2 evdən 80 manat pul, qızıl və məişət əşyaları oğurlamaqda şübhəli bilinən Bakı şəhər sakini, əvvəllər məhkum olunmuş K.Heybətov saxlanılıb.

Bundan başqa, Xətai rayon Polis İdarəsinin 35-ci polis bölməsi əməkdaşlarının keçirdikləri əməliyyat-axtarış tədbirləri nəticəsində rayon ərazisindəki evlərin birindən 150 manat pul, 4500 manat dəyərində qızıl-zinət və məişət əşyaları oğurlamaqda şübhəli bilinən E.Şıxəliyev və qrupun digər üzvləri Bakı şəhər sakinləri A.Cəbrayılov və M.Şıxəliyev saxlanılıblar.

Oxşar əməliyyat Sabunçu rayonunda da keçirilib.

Sabunçu rayon Polis İdarəsi əməkdaşları tərəfindən Bakı şəhər sakini, əvvəllər məhkum olunmuş M.Ağayevdən 355 qram marixuna götürülüb.