Valyutadəyişmə məntəqəsinin işçisini öldürənin işi - Məhkəmədə

Gəncə şəhərində valyutadəyişmə məntəqələrindən birində işləyən şəxsi öldürməkdə ittiham olunan Nicat Dajbanın barəsində olan cinayət işi üzrə ibtidai istintaq başa çatıb.

Teleqraf.com xəbər verir ki, cinayət işi baxılması üçün Gəncə Ağır Cinayətlər Məhkəməsinə göndərilib.

İş araşdırılması üçün hakim Elmin Rüstəmovun icraatına verilib. Yaxın günlərdə məhkəmə başlanacaq.

İttihama görə, ötən il noyabrın 11-də gecə saat 1 radələrində Gəncə şəhər sakini 1989-cu il təvəllüdlü Mirağa Əliyevin ürək nahiyəsindən bıçaqla xəsarət alması nəticəsində müalicə müəssisəsində vəfat etməsi faktı ilə bağlı daxil olan məlumat əsasında dərhal polis və prokurorluq əməkdaşlarının iştirakı ilə hadisə yerinə baxış keçirilib.

İlkin istintaqla hadisənin M.Əliyevin qonşusu, Gəncə şəhər sakini, 1990-cı il təvəllüdlü Dajban Nicat Elçin oğlu tərəfindən şəxsi münasibətlər zəminində yaranmış mübahisə zamanı bıçaqdan istifadə etməklə törədilməsinə əsaslı şübhələr müəyyən edilib.

Nicat Dajban şübhəli şəxs qismində tutulub. Məlum olub ki, qətl hadisəsi Gəncə şəhərinin Üzeyir Hacıbəyli küçəsində iki avtomobilin toqquşması nəticəsində yaranan mübahisə zəminində törədilib.

Belə ki, Mirağa Əliyevin idarə etdiyi avtomobillə Nicat Dajbanın idarə etdiyi minik maşını toqquşub. Qəzadan sonra sürücülər arasında mübahisə yaranıb.

Mübahisə zəminində Nicat Dajban Mirağa Əliyevi bıçaqlayıb. Ürək nahiyəsindən bıçaq xəsarəti alan Mirağa Əliyev xəstəxanaya aparılarkən yolda ölüb.

Qeyd edək ki, mərhum şəhərdə fəaliyyət göstərən valyutadəyişmə məntəqələrindən birində işləyib.

İstintaq orqanı tərəfindən Nicat Dajbanın barəsində Cinayət Məcəlləsinin 120.2.2.-ci (xuliqanlıq niyyəti ilə adam öldürmə) və 228.4-cü (qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə, milli geyim ləvazimatı hesab olunan ərazilərdə və ya ovçuluq peşəsi ilə bağlı olaraq soyuq silahı gəzdirmə) maddələri ilə ittiham elan edilib.