Bakıda ölümlə nəticələnən yol qəzası

Gecə saatlarında Bakıda ölümlə nəticələnən yol qəzası baş verib.

Teleqraf.com-un məlumatına görə, hadisə Nərimanov rayonu ərazisində, Müzəffər Nərimanov küçəsində baş verib. "Toyota Land Cruiser" markalı, H 018 100 dövlət nömrə nişanlı avtomobilin dairəyə çırpılması nəticsəndə sürücü hadisə yerində dünyasını dəyişib.

"Toyota Land Cruiser" markalı avtomobil "Şəfa" stadionunun yaxınlığında yeni istifadəyə verilən tunellə hərəkət edib və sürətlə Müzəffər Nərimanov küçəsinə çıxıb. Sürücü qaranlıq yolda dairəni görməyib və maşını beton dairəyə çırpıb. Hələlik şəxsiyyəti məlum olmayan sürücü sükan arxasında dünyasını dəyişib. Hadisə şahidləri maşının döşəməsinə düşən sürücünün meyitini çıxarıblar.

Faktla bağlı Nərimanov Rayon Polis İdarəsində araşdırma aparılır, sürücünün şəxsiyyəti dəqiqləşdirilir.