Astarada narkotik və silah alverçiləri tutuldu

Astara rayonunda narkotiklərlə bağlı əməliyyat keçirilib.

Teleqraf.com xəbər verir ki, Daxili İşlər Nazirliyinin Baş Narkotiklərlə Mübarizə İdarəsi və Astara rayon polis şöbəsi əməkdaşlarının birgə keçirdiyi əməliyyat nəticəsində 6 nəfər həbs edilib.

Əməliyyat zamanı Astara rayon sakinləri Gülxan Əliyev, Ələddin Məmmədov, İqrar Mirzəyev, Akif Nuriyev, Rəvan Rüstəmov və Abuzər Əhədov həbs edilib.

Keçirilən əməliyyat axtarış tədbirləri zamanı həbs olunan şəxslərdən 700 qram narkotik vasitə olan heroin, 100 qr narkotik vasitə anfetamin, 1kq 380 qram narkotik vasitə tiryək, 460 qram həşiş qətranı aşkar edilib.

Eyni zamanda axtarış zamanı, 1 ədəd naqan tipli odlu, 1 ədəd pnevmatik tipli silah və 1 ədəd maska aşkar edilərək götürülüb.

Faktla bağlı cinayət işi başlanıb.

Hacı Zeynalov