Universitet müəllimlərinə hökm oxundu

Bu gün Bakı Ağır Cinayətlər Məhkəməsində Azərbaycan Mədəniyyət və İncəsənət Universitetinin müəllimi Mehman Məmmədov və Azərbaycan Müəllimlər İnstitutunun Quba filialının direktor müavini Nurbala Süleymanovun cinayət işi üzrə məhkəmə başa çatıb.

Teleqraf.com xəbər verir ki, Azərbaycan Mədəniyyət və İncəsənət Universitetinin müəllimi Mehman Məmmədov Azərbaycan Müəllimlər İnstitutunun Quba filialının direktor müavini Nurbala Süleymanovla cinayət əlaqəsinə girib. Onlar Tələbə Qəbulu üzrə Dövlət Komissiyasının təşkil etdiyi qəbul imtahanlarında müvəffəqiyyət həddini keçə bilməyən Siyəzən rayon sakinindən 7 min 300 manat alaraq hazırladığı saxta rəsmi sənədlər əsasında onun Azərbaycan Dövlət Bədən Tərbiyəsi və İdman Akademiyasına köçürülməsinə nail olmasında və onun guya həmin Akademiyanı bitirməsini təsdiq edən saxta diplomun surətini Dövlət Sərhəd Xidmətinə təqdim etməsində, habelə Milli Elmlər Akademiyasının kiçik elmi işçisi Lütvü Əliyevlə qabaqcadan əlbir olub Abşeron rayon sakininə daxil olduğu Azərbaycan Tibb Universitetinin əczaçılıq fakültəsindən stomatologiya fakültəsinə köçürülməsinə köməklik göstərəcəyini yalandan vəd edərək ondan 10 min manat məbləğində pulu alıblar.

Təqsirləndirilən şəxslər Cinayət Məcəlləsinin 178.3.2 (dələduzluq) və 320.1-ci (rəsmi sənədləri saxtalaşdırma, qanunsuz hazırlama və saxta sənədlərdən istifadə etmə) maddələri ittiham ediliblər.

Hakim Mirzə Xankişiyevin sədrliyi ilə keçirilən prosesdə təqsirləndirilən şəxslərə hökm oxunub.

Məhkəmənin hökmü ilə Mehman Məmmədova Cinayət Məcəlləsibnin 70-ci (şərti məhkum etmə) maddəsi tətbiq edilib. O, şərti cəza alaraq məhkəmə zalından azadlığa buraxılıb. Bundan başqa, zamində olan Nurbala Süleymanov 8 il müddətinə azadlıqdan məhrum edilib. Nurbala Süleymanov məhkəmə zalından həbs edilib.

Hacı Zeynalov