Piyadanı öldürən sürücü məhkəmə zalında həbs edildi

Gəncə Ağır Cinayətlər Məhkəməsində ölümlə nəticələnən yol nəqliyyat hadisəsi törətməkdə təqsirli bilinən 1951-ci il təvəllüdlü Tofiq Məmmədovun cinayət işi üzrə məhkəmə başa çatıb.

Teleqraf.com xəbər verir ki, Tofiq Məmmədov 20 yanvar 2014-cü il tarixdə “Mersedes-Benz C180” markalı avtomobili idarə edərkən sürət həddini aşıb. O, Gəncə şəhəri, Ş.İ.Xətai prospekti ilə hərəkətdə olarkən yolu keçmək istəyən piyada Əntiqə Allahverdiyevanı vurub. Piyada aldığı xəsarətdən hadisə yerində ölüb. Qəzanı törədən sürücü hadisə yerindən qaçsa da, sonradan məsuliyyətə cəlb olunub.

Tofiq Məmmədov Cinayət Məcəlləsinin 263-1.3-cü (yol hərəkəti qaydalarını pozma - iki və daha artıq şəxsin ölümünə səbəb olduqda) və 264-cü (yol nəqliyyat hadisəsi yerindən qaçma) maddələri ilə ittiham edilib.

Hakim Zabil Qasımovun sədrliyi ilə keçirilən prosesdə təqsirləndirilən şəxsə hökm oxunub. Məhkəmənin hökmü ilə Tofiq Məmmədov 7 il müddətinə azadlıqdan məhrum edilib. Onun başqa yerə getməmək barədə qəti imkan tədbiri ləğv edilib və o, məhkəmə zalından həbs edilib.

Hacı Zeynalov