"Əsas məsuliyyət Əli Həsənovun üzərinə düşür” - Vüqar Səfərlinin işi

Ləğv edilmiş Kütləvi İnformasiya Vasitələrinin İnkişafına Dövlət Dəstəyi Fondunun sabiq icraçı direktoru Vüqar Səfərli, müvafiq vəzifələrdə çalışmış Bünyamin İsmayılov, Ədalət Vəliyev, Nadir Məmmədov, Bəxtiyar Fətullayev, Təmkin Xəlilov, Telman Tahirov, Valeh Orucov, Təhminə Yaqubova, Şahin İbrahimov və Namiq Hacıyevin cinayət işi üzrə məhkəmə prosesi keçirilib.

Teleqraf.com xəbər verir ki, bu gün Bakı Ağır Cinayətlər Məhkəməsində hakim Azər Paşayevin sədrliyi ilə baş tutan prosesdə təqsirləndirilən şəxslərin vəkillərin müdafiə çıxışları ediblər.

Nadir Məmmədovun vəkili Cavanşir Süleymanov bildirib ki, sözügedən cinayət işində əsas məsuliyyət Prezident Administrasiyasının sabiq şöbə müdiri Əli Həsənovun, onun oğlu Şamxal Həsənlinin və baldızı Gülər Vəliyevanın üzərinə düşür: "Mən onların məhkəməyə çağırılması üçün vəsatət verdim. Dəfələrlə məhkəmədə ifadə verməli olduqlarını bildirdim. Buna baxmayaraq, vəsatətim rədd edildi. Kim yeyibsə o, da gəlib ödəsin. Nadir Məmmədova gəlincə isə o dəymiş ziyanın 50 faizini ödəyib. İndi Əli Həsənov ödəyib, ya oğlu ödəyib, onun bir fərqi yoxdur. Xahiş edirəm Nadir Məmmədova cəza təyin edərkən bunlar nəzərə alınsın".

Vəkillərin çıxışlarından sonra məhkəmə təqsirləndirilən şəxslərə son söz verib.

Təqsirləndirilən şəxslərdən Təmkin Xəlilov, Təhminə Yaqubova və Şahin İbrahimov məhkəmədən bəraət verilməsini istəyiblər.

Təqsirləndirilən şəxslərdən Vüqar Səfərli, Nadir Məmmədov və Bəxtiyar Fətullayev son söz demək üçün çıxışa hazır olmadıqları üçün məhkəmədən vaxt istəyiblər.

Hakim də onlara çıxışa hazırlaşmaq üçün vaxt verib.

Növbəti proses dekabrın 21-də davam edəcək.

Qeyd edək ki, bundan əvvəl çıxış edən prokuror Vüqar Səfərlinin 11 il müddətinə azadlıqdan məhrum edilməsini istəyib. Vüqar Səfərlinin 3 il dövlət orqanlarında vəzifə tutmaqdan mərhum edilməsini təklif edib.

Prokuror digər təqsirləndirilən Nadir Məmmədov, Bünyamin İsmayılov, Telman Tahirov, Ədalət Vəliyev, Namiq Hacıyevin hər birinin 7 il, Təmkin Xəlilov, Valeh Orucov, Şahin İbrahimov və Bəxtiyar Fətullayevin isə 2 il azadlıqdan məhrum edilməsini tələb edib.

Adı çəkilən təqsirləndirilən şəxslər barəsində məhkəmə istintaqı zamanı seçilmiş polisin nəzarətinə verilmə qətimkan tədbiri ləğv edilməli və hər biri məhkəmə zalında həbs edilməsi təklif olunub.

Prokuror cinayət işi üzrə təqsirləndirilən Təhminə Yaqubovaya isə 6 il şərti cəza verilməsini xahiş edib.

Prokuror Medianın İnkişafı üzrə Dövlət Komitəsi tərəfindən verilən mülki iddianın təmin olunmasını istəyib.

İttihama görə, aparılmış istintaq tədbirləri ilə Fondun sabiq icraçı direktoru Vüqar Səfərlinin müvafiq vəzifələrdə çalışmış Bünyamin İsmayılov, Ədalət Vəliyev, Nadir Məmmədov və digər 7 nəfər şəxslə qabaqcadan əlbir olub vəzifə səlahiyyətlərindən sui-istifadə edərək dövlət satınalmalarına dair qanunvericiliyin tələblərinin pozulması, dövlət vəsaitlərinin təyinatı üzrə istifadə edilməməsi, tikinti normalarına əməl olunmamaqla iş həcmləri və qiymətlərinin şişirdilməsi yolu ilə dövlətə məxsus ümumilikdə 18 milyon 500 min manat məbləğində pul vəsaitinin mənimsəmə və israf etmə yolu ilə talanmasına, rəsmi sənədlərə bilə-bilə yalan məlumatlar daxil etməklə vəzifə saxtakarlığı törədilməsinə, habelə cinayət yolu ilə əldə edilmiş 5 milyon 700 min manat pul vəsaitinin leqallaşdırmasına əsaslı şübhələr müəyyən edilib.

Toplanmış sübutlar əsasında Vüqar Səfərli və digərlərinə müvafiq olaraq Cinayət Məcəlləsinin 179.4 (mənimsəmə - xüsusilə külli miqdarda ziyan vurmaqla törədildikdə), 193-1.3.2 (cinayət yolu ilə əldə edilmiş pul vəsaitlərini leqallaşdırma - külli miqdarda törədildikdə), 308.2 (vəzifə səlahiyyətlərindən sui-istifadə etmə - ağır nəticələrə səbəb olduqda), 313 (vəzifə saxtakarlığı) və digər maddələri ilə ittiham elan edilib, Vüqar Səfərli barəsində məhkəmənin qərarı ilə həbs, digər şəxslər barəsində isə polisin nəzarəti altına vermə qətimkan tədbiri seçilib.

İbtidai istintaq zamanı cinayətin törədilməsi nəticəsində vurulmuş maddi ziyanın bir hissəsinin ödənilməsi təmin edilib, habelə təqsirləndirilən şəxslərə məxsus olan daşınar və daşınmaz əmlak və bank əmanətlərinin üzərinə həbs qoyulub.

Cinayət işi üzrə Medai İnkişaf Agentliyi zərərçəkmiş qismində tanınıb.