"Narkotikin təsiri altında olmuşam" - Azyaşlı oğlunu öldürməyə cəhd edən ata danışdı

Bakının Yasamal rayonunda azyaşlı oğluna xəsarət yetirməkdə ittiham olunan Samir Ağakərimovun cinayət işi üzrə məhkəmə prosesi keçirilib.

Teleqraf.com xəbər verir ki, bu gün Bakı Ağır Cinayətlər Məhkəməsində hakim Azər Paşayevin sədrliyi ilə baş tutan prosesdə Samir Ağakərimov ifadə verib.

O qeyd edib ki, hadisə günü həyat yoldaşı Pərvanə ilə mübahisələri olub: "Evin təmiri ilə bağlı əşyaları həyətə çıxarmışdıq. Bununla bağlı həyətdə iş görürdüm. Bu zaman evin əşyaları ilə bağlı həyat yoldaşımla davamız oldu. Həmin vaxt uşağı tullamağım yadıma gəlmir".

İki ailəsi olduğunu deyən təqsirləndirilən şəxsin sözlərinə görə, internat tipli uşaq evində böyüyüb: "Pərvanə də yetim olub. Biz bir-birimizi sevmişik, evlənmişik. Aramızda problem olmayıb".

Təqsirləndirilən şəxsin sözlərinə görə, hadisə baş verən zaman narkotikin təsiri altında olub: "Hadisə günü də psixotrop maddə qəbul etmişdim. Buna görə də hadisənin baş verməsini xatırlamıram. Məni prokurorluğa apardılar. Dedilər ki, ifadə ver. Bildirdim ki, özümdə deyiləm, necə ifadə verim?".

O deyib ki, həyat yoldaşı ilə ev əşyalarını atmaları üstündə mübahisələri yaranıb: "Ola bilər ki, uşağı döşəyin üstünə atmışam. O zaman xəsarət alıb. Uşağı möhkəm yerə çırpmamışam. Belə bir halın olmasını da xatırlamıram".

Samir Ağakərimov deyib ki, paytaxtın müxtəlif yerlərində fəhləlik edib və ailəsini dolandırıb.

Onun sözlərinə görə, son iki ildə işsiz olub. Tural adlı şəxsin onlara yardım etdiyini deyən təqsirləndirilən şəxsin sözlərinə görə, həmin şəxsi internatda tanıdığı uşaqların vasitəsi ilə tanış olub. O arvadının xəyanət etməsi ilə bağlı heç bir şübhəsi olmayıb: "Arvadımı heç vaxt güdməmişəm. Buna əsas da olmayıb. Amin mənim öz oğlum olub. Onun mənim uşağım olmaması ilə bağlı heç bir şübhəm də olmayıb".

Samir Ağakərimovun məhkəmədə verdiyi ifadəsi ilə ibtidai istintaq zamanı verdiyi ifadəsi arasında ziddiyyətlər yaranıb. Buna görə də onun istintaqa verdiyi ifadəsi elan edilib. Samir Ağakərimov istintaqa verdiyi ifadəsində deyib ki, arvadının başqası ilə münasibətinin olmasından şübhələnib, buna görə də onu izləyib. O, həmçinin ifadəsində göstərib ki, azyaşlı oğlunun onun övladı olmamasına şübhələri olub. Samir Ağakərimov deyib ki, istintaqa ifadə verən zaman narkotikin təsiri altında olub, buna görə də nə danışdığını bilməyib.

O, istintaqa verdiyi ifadəsini təsdiq etməyib. İttihama görə, Yasamal rayon Polis İdarəsinin 29-cu polis şöbəsinə bu ilin aprelin 26-da saat 16 radələrində 30 yaşlı Samir Ağakərimovun 1 yaşlı oğlunu evdən həyətə tullaması nəticəsində uşağın kəllə-beyin travması xəsarəti ilə xəstəxanaya yerləşdirilməsi barədə məlumat daxil olub.

Polis əməkdaşlarının keçirdikləri əməliyyat tədbiri nəticəsində Samir Ağakərimov şübhəli şəxs qismində tutularaq istintaqa təhvil verilib. Onun barəsində Cinayət Məcəlləsinin 126.2.3-cü maddəsi (qəsdən sağlamlığa ağır zərər vurma - xüsusi amansızlıqla, o cümlədən zərərçəkmiş şəxsə ağır iztirablar verməklə və ya sifarişlə, habelə təqsirkar üçün aşkar surətdə köməksiz vəziyyətdə olan şəxsə qarşı törədildikdə) ilə cinayət işi başlanıb.