19 Yanvar 15:05
1 344
12 Punto 14 Punto 16 Punto 18 Punto

Prokuror Tariyel Qurbanovu şantaj etməkdə ittiham olunan Ümman Əliyev, Natiq Nuriyev, Pərvin Yusifov, Ələkbər Nuriyev, İlqar Əliyev, Elnur Eldarov və Sahilə Məmmədovanın cinayət işi üzrə məhkəmə prosesi keçirilib.

Teleqraf.com-un xəbərinə görə, Bakı Ağır Cinayətlər Məhkəməsində hakim Azər Paşayevin sədrliyi ilə baş tutan prosesdə cinayət işi üzrə məhkəməyə gələ bilməyən şahidlərin ifadəsi elan olunub. Onlardan biri də təqsirləndirilən Ümman Əliyevin valideynləridir.

Ümman Əliyevin anası Hədiyyə Əliyeva bildirib ki, həyat yoldaşı Bəhruz Sultanov və xəstə övladı Vüsal Əliyevlə birlikdə Quba rayonunun Çiçi kəndində yaşayır: “Üç oğlan, bir qız övladım var. İki oğlum – Ümman və İlqar uzun müddətdir Bakıda müxtəlif yerlərdə işləyib, orada yaşayıblar. Oğlum Vüsal epilepsiya xəstəliyindən əziyyət çəkir. Qızım ailəlidir”.

Hədiyyə Əliyevanın sözlərinə görə, Ümman 2013-cu ilin aprelində hərbi xidmətə gedib, 2014-cü ilin sonunda isə hərbi xidmətdən qayıdıb: “Hərbi xidmətdən qayıtdıqdan sonra Bakı şəhərinə getdi, orada işləməyə başladı. Ümman bildirdi ki, müxtəlif hamamlarda ofisiant və kisəçi işləyir. 2019-cu ilin dekabrında işlədiyi hamamların birindən pul oğurladığına görə həbs olundu, 2 il 6 ay cəza çəkəndən sonra 2021-ci ilin yay aylarında vaxtından əvvəl cəzasını bitirdi, Çiçi kəndinə gəldi. Bizimlə yaşamağa başladı”.

Şahid bildirib ki, həmin ilin noyabrın sonlarında Ümman yenidən Bakı şəhərinə gedib: “Telefonla danışan zaman bildirdi ki, yenidən hamamda işə düzəlib.

Ümman tutulmamışdan əvvəl işlədiyinə görə evə ayda bir dəfə, ya da iki aydan bir 50-100 manat göndərirdi. 2022-ci ilin yanvarın əvvəllərində isə xəstə qardaşının müalicəsinə görə əməkhaqqı kartıma 500 manat göndərdi. Həmin pulu Vüsalın müalicəsinə xərcədik.

Ümmandan həmin pulu haradan əldə etdiyini soruşdum. Təxminən 5 il olar işlədiyi hamama müştəri kimi gələn tanışı Tariyel müəllimdən aldığını bildirdi. Tariyel müəllimi uzun müddətdir ki, tanıyıram. Ümman həbsdə olduğu müddətdə pul lazım olduğuna görə Tariyel müəllimlə əlaqə saxlamağı, onun pul verəcəyini demişdi. O vaxt Tariyel müəllimlə əlaqə saxladım, pul lazım olduğuna görə borc istədim. O da Ümmanı tanıdığını, pulu borc olaraq deyil, xərcləməyə verdiyini bildirdi.

Tariyel müəllim bank kartıma 2019-2000-ci illərdə təxminən üç dəfə olmaqla ümumilikdə 900 manat göndərdi”.

Hədiyyə Əliyevanın sözlərinə görə, oğlu İlqar da Ümman həbsdən çıxmamışdan qabaqkı dövrdə Tariyel Qurbanovla pul borcu verməsinə görə danışıb: “Lakin İlqarın Tariyel müəllimlə görüşməsindən və hansı söhbətlər etməsindən xəbərim olmayıb. 2021-ci ilin dekabrında İlqar bildirdi ki, Tariyel müəllim əməkhaqqı kartıma 2000 manat göndərib. Həmin pulları İlqar hesabdan bankomat vasitəsilə çıxardı. Həmin pulla İlqar mənə 150 manata mobil telefon, 240 manata evi qızdırmaq üçün odun aldı. Təxminən 200 manatlıq kənd mağazasına olan borcumuzu bağladı, 50 manatlıq bazarlıq etdi. Pulun qalan hissəsindən isə xəbərim yoxdur”.

Hədiyyə Əliyeva qeyd edib ki, 2022-ci ilin yanvarın əvvəllərində Ümman yaşadıqları kəndə “Opel” markalı avtomobillə gəlib: “Avtomobili Tariyel müəllimin verdiyi pulla 10200 manata aldığını bildirdi. Sonradan həmin avtomobili 7000 manata satdı, “VAZ-2107 markalı avtomobil aldı. Həmin avtomobili də fevral ayında satdı, yenidən “VAZ-2107” markalı başqa bir avtomobil aldı.

Bunları telefonda danışarkən Ümmandan eşitmişəm. Tariyel müəllimin oğluma niyə görə bu məbləğdə pul verməsinin səbəbini soruşanda, yaxşı münasibəti olduğuna görə həmin pulu verdiyini bildirdi”.

Şahid deyib ki, İlqar 2022-ci ilin yanvar ayının sonlarında yaşadıqları kəndə yaşıl rəngli “Opel” markalı avtomobillə gəlib: “”Artıq mən də, ataları Bəhruz da narahat qaldıq. İlqarın həmin avtomobili haradan əldə etməsini soruşduq. İlqar da avtomobilə görə pulu Tariyel müəllimdən aldığını, Tariyel müəllimin yaxşılıq edərək ona pul verdiyini, həmin pula özünə avtomobil aldığını dedi. Avtomobillə gəldiyi gün İlqar bir gecə kənddə qaldı. Sonra geri qayıtdı. Sonuncu dəfə isə İlqar həbs olunmamışdan 3-4 gün əvvəl kənddə qalıb və yenidən Bakıya qayıdıb”.

Hədiyyə Əliyevanın sözlərinə görə, Ümmanın həbs olunduğunu eşidəndə Tariyel Qurbanova zəng edib: “Ondan nə baş verdiyini soruşdum. Tariyel müəllim bildirdi ki, oğlanlarına həmişə yaxşılıq etmişəm, lakin son vaxtlar Ümman onu şantaj edib, pul istəyib. Buna görə də Ümmandan şikayət edib. Lakin dəqiqliklə nə baş verdiyini bildirmədi”.

Digər şahid, Ümman və İlqar Əliyevlərin ataları Bəhruz Sultanov da həyat yoldaşı Hədiyyə Əliyevanın ifadəsinə uyğun danışıb.

İttihama görə, dəstə üzvləri Tariyel Qurbanovun hamamda çəkilmiş fotolarını ona göndəriblər və pul verməsini tələb ediblər. Əks halda həmin fotoları sosial şəbəkələrdə yaymaqla hədələyiblər.

Qeyd edək ki, Tariyel Qurbanov Qaradağ və Hacıqabul rayonlarında prokuror olub. Daha sonra o, Baş Prokurorluğun Dövlət təhlükəsizliyi, fövqəladə hallar və sərhəd xidməti orqanlarının istintaq, təhqiqat və əməliyyat-axtarış fəaliyyətində qanunların icrasına nəzarət idarəsinin rəis müavini olub.

Ötən ilin mart ayında vəzifəsindən azad olunan Tariyel Qurbanov sonradan Abşeron rayon prokurorunun böyük köməkçisi təyin olunub.

Tariyel Qurbanov Dini Qurumlarla İş üzrə Dövlət Komitəsinin sədri Mübariz Qurbanlının qardaşıdır.

Xatırladaq ki, Tariyel Qurbanov bir vaxtlar sol əllə hərbi salam verməsi ilə gündəmə gəlmişdi.


Müəllif: Hacı Zeynalov