Rüşvət alan baş direktor və müavini hakim qarşısında - Video

Səhiyyə Nazirliyinin “Respublika Narkoloji Mərkəzi” Publik Hüquqi Şəxsinin baş direktoru işləmiş Elşən Mustafayev və həmin qurumun direktor müavini işləmiş Zamin Əliyevin cinayət işi üzrə məhkəmə prosesi keçirilib.

Teleqraf.com xəbər verir ki, bu gün Bakı Ağır Cinayətlər Məhkəməsində hakim Səbinə Məmmədzadənin sədrliyi ilə keçirilən prosesdə təqsirləndirilən şəxslərin anket məlumatları dəqiqləşdirilib.

Zamiq Əliyevin vəkili vəsatətlə çıxış edib. O, müvəkkilin ev dustaqlığına buraxılması ilə bağlı məsələ qaldırıb.

Elşən Mustafayevin də vəkili vəsatətlə çıxış edib. Bildirib ki, Elşən Mustafayevin səhhətində problemlər var. Bu səbəbdən o, Elşən Mustafayevin ev dustaqlığına buraxılmasını istəyib.

Elşən Mustafayevin vəkili vəsatətini əsaslandırarkən deyib ki, müvəkkili xəstəlikdən əziyyət çəkir. Bu səbəbdən bir müddət əvvəl təcridxanadan müalicə müəssəsinə köçürülüb. Hazırda da orada müalicə edilir.

Daha sonra cinayət işi məhkəmə baxışına verilməsi müzakirə edilib. Cinayət işini məhkəmə baxışına verilməsinə etiraz edilməyib.

Daha sonra hazırlıq iclasının qərarı qəbul edilməsi üçün hakimlər heyəti müşavirə otağına yollanıblar.

Müşavirədən qayıdan hakimlər qərar elan ediblər. Qərara görə, təqsirləndirilən şəxslərin vəkillərin vəsatətləri təmin edilməyib.

Məhkəmə baxışı iyulun 4-ə təyin edilib.

Qeyd edək ki, Azərbaycan Respublikası Səhiyyə Nazirliyinin “Respublika Narkoloji Mərkəzi” Publik Hüquqi Şəxsinin baş direktoru işləmiş Mustafayev Elşən Hümbət oğlu və həmin qurumun direktor müavini işləmiş Əliyev Zamin Sabir oğlunun qanunsuz əməlləri barədə keçirilmiş əməliyyat-axtarış tədbirləri nəticəsində Baş prokuror yanında Korrupsiyaya qarşı Mübarizə Baş İdarəsində başlanmış cinayət işinin istintaqı yekunlaşıb.

İbtidai istintaqla Elşən Mustafayevin vəzifəyə təyin olunduğu 2023-cü ilin aprel ayından etibarən müavini Zamin Əliyev ilə əlbir olub həmin Mərkəzdə işləyən həkimlərin gələcəkdə fəaliyyətinə maneələrin yaradılmaması, pasiyentlərin stasionar müalicə müddətlərinin uzadılması, onların daha keyfiyyətli müalicə almaları üçün xəstə sayı daha az olan şöbələrə və ya tək nəfərlik palatalara qəbul edilməsi, narkomaniya xəstəliyindən əziyyət çəkən şəxslərin xüsusi terapiya proqramına qəbul olunması və digər məqsədlərlə ayrı-ayrı vətəndaşlardan müxtəlif məbləğlərdə pul vəsaitini rüşvət qismində almalarına əsaslı şübhələr müəyyən edilib.

Toplanmış sübutlar əsasında Elşən Mustafayev və Zamin Əliyevə Cinayət Məcəlləsinin 308.2 (vəzifə səlahiyyətlərindən sui-istifadə ağır nəticələrə səbəb olduqda), 311.3.1 və 311.3.2-ci (rüşvət alma qabaqcadan əlbir olan bir qrup şəxs tərəfindən və təkrar törədildikdə) maddələri ilə yekun ittiham elan edilərək barələrində müstəntiqin vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında məhkəmənin qərarı ilə həbs qətimkan tədbiri seçilib.