Kafe sahibini qarət edənə hökm oxundu

Bu gün Bakı Ağır Cinayətlər Məhkəməsində oğurluq etməkdə təqsirli bilinən Mingəçevir şəhər sakini Sönməzbəy Məmmədovun cinayət işi üzrə məhkəmə prosesi başa çatıb.

Teleqraf.com xəbər verir ki, bu ilin fevralın 25-də Yasamal rayonu ərazisində yerləşən “Yanar dağ” kafesində, oranın sahibi Natiq Məmmədzadənin otağından 12000 manat oğurlanıb.

Daxili İşlər Nazirliyinin Növbətçi Hissələri İdarəertmə Xidməti və Yasamal Rayon Polis İdarəsinin 26-cı polis bölməsi əməkdaşlarının həyata keçirdikləri əməliyyat-axtarış tədbirləri nəticəsində hadisəni törətmiş Mingəçevir şəhər sakini Sönməzbəy Məmmədov Qusar sərhəd-keçid məntəqəsindən keçərkən tutulub.

Hakim Əhməd Quliyevin sədrliyi ilə keçirilən prosesdə təqsirləndirilən şəxsə hökm oxunub. Məhkəmənin hökmü ilə Sönməzbəy Məmmədov 8 il müddətinə azadlıqdan məhrum edilib.

Hacı Zeynalov