Məktəbdə zorlama cinayəti ilə bağlı yeni qərar

Xırdalan şəhərində 9-cu sinif şagirdinə qarşı seksual xarakterli hərəkətlər etməkdə təqsirli bilinən Elməddin Qədirli, Nicat Ağayev, Elşən Novruzov və Maqsud Şamiyevin Baş Prokurorluğun kasasiya protestinə baxılıb.

Teleqraf.com xəbər verir ki, Bakı Ağır Cinayətlər Məhkəməsinin hökmü ilə müəyyən edilib ki, təqsirləndirilən şəxslər seksual xarakterli zorakılıq hərəkətlərini Xırdalan şəhərində orta məktəblərdən birində törədiblər.

Orta məktəbin yuxarı sinfində oxuyan 4 nəfər - Elməddin Qədirli, Nicat Ağayev, Elşən Novruzov və Maqsud Şamiyev eyni məktəbdə oxuyan Samirə Məmmədova (ad şərti verilib) ilə cinsi əlaqədə olublar. Onlar bu əməllərini videokamera ilə lentə alıblar.

Bundan sonra həmin şəxslər videokadrlar vasitəsi ilə qıza qarşı hədə-qorxu gəliblər və onu şantaj ediblər.
Qeyd edək ki, Bakı Ağır Cinayətlər Məhkəməsinin hökmü ilə təqsirləndirilən şəxslərin hər biri 5 il 6 ay müddətinə azadlıqdan məhrum edilib. Təqsirləndirilən şəxslərin barəsində başqa yerə getməmək barədə verilmiş qəti-imkan tədbiri ləğv edilib və onlar məhkəmə zalındaca həbs ediliblər.

Hökmdən təqsirləndirilən şəxslərin vəkilləri apelyasiya şikayəti veriblər. Onlar şikayətlərində müdafiə etdikləri şəxslərin günahsız olduqlarını və bəraət hökmünün çıxarılmasını istəyiblər.

Bir müddət əvvəl Sumqayıt Apelyasiya Məhkəməsində, hakim İlham Həsənovun sədrliyi ilə keçirilən prosesdə qərar elan edilib. Qərara görə, Elməddin Qədirli, Nicat Ağayev, Elşən Novruzov və Maqsud Şamiyev barəsində seksual xarakterli hərəkətlər etmələri ilə bağlı ittiham üzrə bəraət hökmü çıxarılıb.

Amma onların cəzaları dəyişməyib. Məhkəmə hədə-qorxu gəlməklə bağlı ittiham üzrə cəza qüvvədə saxlanılıb.

Bu qərardan prokurorluq kasasiya protesti verib. Prokurorluğun protestinə Ali Məhkəmədə baxılıb.
Nicat Ağayevin vəkili Gülşən Salmanova Teleqraf.com-a bildirib ki, prokurorluğun kasasiya protestinə hakim Əli Seyfəliyevin sədrlik etdiyi kollegiyada baxılıb.

Vəkilin sözlərinə görə, prokurorluğun protesti təmin edilməyib və Sumqayıt Apelyasiya Məhkəməsinin qərarı qüvvədə saxlanılıb.

Hacı Zeynalov