Bakıda baş verən qəzalarda 2 nəfər öldü

Bakının Qaradağ rayonunda ağır yol-nəqliyyat hadisəsi baş verib.

Teleqraf.com xəbər verir ki, hadisə rayonun Qobustan qəsəbəsində qeydə alınıb.

Qəsəbə sakini Tural Babayev idarə etdiyi “Mercedes” markalı avtomobillə yolu keçən həmyerlisi Cavid Nuriyevi vurub. Xəstəxanaya yerləşdirilmiş Cavid Nuriyev orada ölüb.

Daha bir yol qəzası Sabunçu rayonunun Pirşağı qəsəbəsində qeydə alınıb. Bakı şəhər sakinləri Tehran Qasımlının idarə etdiyi “MG” və Nəriman Abdulovun idarə etdiyi “VAZ-21043” markalı avtomobillər toqquşub.

Xəsarətlə xəstəxanaya yerləşdirilmiş Nəriman Abdulov orada ölüb.

Oxşar hadisə Nərimanov rayonunun F.X.Xoyski küçəsində də qeydə alınıb. Müəyyən edilməmiş avtomobillə yolu keçən Bakı şəhər sakini Lətafət İbrahimova vurulub. Lətafət İbrahimovaya xəstəxanada ilkin tibbi yardım göstərildikdən sonra buraxılıb.

Nərimanov rayon Polis İdarəsinin 16-cı polis bölməsi əməkdaşları tərəfindən hadisənin “Hyundai” markalı avtomobilin sürücüsü, Bakı şəhər sakini Rəna Osmanova tərəfindən törədilməsi müəyyən edilib.

Hacı Zeynalov