"Direktor təyinatında ciddi qanun pozuntularına yol verilir" - Millət vəkili

16 May 2022 10:22 (UTC+04:00)

Son zamanlar ümumtəhsil məktəblərində baş verən neqativ hallar Milli Məclisin Elm və Təhsil Komitəsinin üzvü kimi məni çox narahat edir. Məktəb direktorlarının təyinatında yol verilən ciddi qanun pozuntuları neqativ halların dərinləşməsinə səbəb olur.

Teleqraf.com xəbər verir ki, bunu Milli Məclisin Elm və Təhsil Komitəsinin üzvü Etibar Əliyev deyib.

Onun sözlərinə görə, ümumtəhsil məktəblərinin özündə çalışan direktor müavinləri təyinatdan kənarda qalır:

"Boşalan direktor yerlərinə kənar məktəblərdən direktor müavinləri təyinat alırlar. Bu isə kollektivdə intriqaların yaranmasına, idarəçilik ənənələrinin pozulmasına və bütün dünyada qəbul olunmuş sosial lift prinsipinin ayaqlar altına atılmasına səbəb olur. Konkret olaraq iki nümunə göstərəcəm.

210 nömrəli tam orta məktəbə direktor 95 nömrəli tam orta məktəbdə direktor müavini işləyən Həqiqət Gülalıyeva təyin olunub. 165 nömrəli tam orta məktəbə isə 252 nömrəli məktəbdə cəmi 1 ilə yaxın direktor müavini işləmiş Ruslan Nağıyev təyin edilib.

Bildiyimiz kimi, ümumtəhsil məktəblərinə direktor vəzifəsinə təyinat təcrübəsi, şəxsi bacarıq və keyfiyyətləri əsas götürülməklə təlimlərə cəlb olunduqdan sonra müvafiq imtahan və müsabiqələrdən keçən şəxslər təyinat almalıdırlar. Verilən məlumatlara görə, hər iki şəxs faktiki olaraq imtahan və müsahibələrdə iştirak etməyiblər".

Etibar Əliyev qeyd edib ki, belə halların sayı çoxdur: "Həmçinin, qapalı və mübhəm direktor təyinatları geniş vüsət alıb. Ümumi təhsilin mövcud duruma düşməsinə Təhsil Nazirliyinin yanında İctimai Şuranın üzvlərinin də münasibətini bilmək istərdim".