“Poroşenko xahiş etdi ki, Putinlə danışım və o razılıq versin...” - Medvedçuk ifadə verdi

23 May 2022 16:22 (UTC+04:00)

Ukrayna Təhlükəsizlik Xidməti Ali Radanın deputatı Viktor Medvedçukun “Samara-Qərb istiqaməti” neft kəmərinin dövlət mülkiyyətindən çıxarılmasının təfərrüatlarını danışdığı video yayımlayıb.

Teleqraf.com xəbər verir ki, deputat xüsusən də bu sxemdə eks-prezident Petro Poroşenkonun rolunu qeyd edir.

“Mən boru kəməri ilə Poroşenkonun xahişi ilə məşğul olmağa başladım. 2016-cı ildə o vaxtkı prezident Poroşenko Rusiya Federasiyasının rəhbərliyi ilə əlaqələrimi və Rusiya rəhbərliyinin mənə münasibətini nəzərə alaraq məndən Ukraynaya və Avropaya dizel tədarükü edən “Prykarpatzapadtrans” borusunun alınmasını xahiş etdi”, - deyə Medvedçuk bildirib.

Medvedçuk iddia edib ki, ondan Rusiya Federasiyasının Prezidenti Vladimir Putinlə danışmağı və bu borunu ala bilmək üçün “Transneft” tərəfindən borunun satışına razılıq verməsini xahiş ediblər.

Onun sözlərinə görə, sonradan bu xahişin Poroşenko tərəfindən edildiyi məlum olub.

Medvedçukun sözlərinə görə, bunun üçün bir sıra tədbirlər görmək lazım idi, bu işdə məhkəmələr, prokurorluq, Antiinhisar Komitəsi, Dövlət Əmlak Fondu iştirak edib.

“Onların hamısı, əlbəttə ki, prezident Poroşenkonun şəxsi maraqları üçün lazım olan qərarlar qəbul etdi”, - deyə Medvedçuk bildirib.