Rusiya-Ukrayna müharibəsinin Afrikaya təsiri: Milyonlarla insan...

27 May 2022 14:08 (UTC+04:00)

Afrikada təxminən 1,8 milyon insan Ukrayna böhranının yaratdığı iqtisadi problemlərə görə həddindən artıq yoxsul vəziyyətə düşə bilər.

Teleqraf.com xəbər verir ki, bu barədə Afrika İnkişaf Bankının (AİB) “2022-ci ildə Afrikanın iqtisadi perspektivləri” adlı hesabatında deyilir.

AİB-in illik assambleyasının keçirildiyi Qananın paytaxtı Akkrada iclas “Afrika üçün iqlimin davamlılığını və ədalətli enerji keçidini təşviq etmək” mövzusunda təqdim edilib.

Sənəddə deyilir: “Koronavirus pandemiyası və Rusiya-Ukrayna münaqişəsi Afrikada qalıcı iz buraxmaq təhlükəsi yaradır. Afrikada 2021-ci ildə təxminən 30 milyon insan həddindən artıq yoxsulluq içində idi. Həmin il qitədəki pandemiya səbəbindən 22 milyon iş yeri itirildi. AİB-in hesabat müəlliflərinin fikrincə, bu sahədə mənfi tendensiya 2022-ci ilin ikinci yarısında, həmçinin 2023-cü ildə də davam edəcək.

Bundan əlavə, 2022-ci ildə Afrika qitəsində daha 1,8 milyon insan Rusiya və Ukrayna arasında münaqişə nəticəsində yaranan iqtisadi problemlər üzündən ifrat yoxsulluğa qərq ola bilər. 2023-cü ildə bu rəqəm daha 2,1 milyon arta bilər. Rusiya və Ukrayna Afrika qitəsinin əsas taxıl tədarükçüsüdür.

Rusiya-Ukrayna münaqişəsinin səbəb olduğu pandemiya və inflyasiya təzyiqlərinin davam etməsi səbəbindən Afrikada iqtisadi artım 2022-ci ildə 4,1%-ə qədər azala və 2023-cü ildə eyni səviyyədə qala bilər”.

AİB əmindir ki, ərzaq və enerji qiymətlərinin artmasının təsirlərini yumşaltmaq üçün Afrikanın təcili olaraq anti-böhran siyasətinə, o cümlədən subsidiyalara ehtiyacı var.