Qaxda iki gün əvvəl ilan sancan qadın xəstəxanada keçinib

31 May 2015 00:35 (UTC+04:00)

Qaxda iki gün əvvəl ilan sancan qadın xəstəxanada keçinib. Ötən gün daha bir 17 yaşlı gənci də ilan sancıb.

APA-nın Şəki-Zaqatala bürosunun məlumatına görə, ilan sancması ilə əlaqədar ağır vəziyyətdə Respublika Toksikologiya Mərkəzinə göndərilən Qax şəhəri, Cəfər Cabbarlı küçəsində yaşayan 1958-ci il təvəllüdlü Gülmira Qasım qızı Xinqalova may ayının 30-u orada keçinib.

Qeyd edək ki, Gülmira Xinqalova may ayının 28-i axşam saatlarında Qax rayonunda ailəsinə məxsus ot sahəsində işləyərkən onu ilan sancmışdı.

Ötən gün Qax rayonu İlisu kənd sakini, 1998-ci il təvəllüdlü Toğrul Cəfər oğlu Vahabzadə rayonun Ağyazı kəndi ərazisində ot yığarkən ayağının daban hissəsindən ilan sancıb. 17 yaşlı Toğrul Vahabzadəyə Qax Rayon Mərkəzi Xəstəxanasında ilkin tibbi yardım göstərildikdən sonra vəziyyəti ağır olduğundan müalicəsini davam etdirmək üçün Bakıya, Respublika Toksikologiya Mərkəzinə göndərilib.