Vətənə məhəbbət, xeyirxahlıq Zərifə xanımın portretinin cizgilərdir – Professor

Azərbaycan tibb elmində silinməz izlər qoymuş, səhiyyəmizə böyük töhfələr vermiş akademik Zərifə xanım Əliyevanı xatırlayanda həm də göz önündə mənəvi kamilliyinin ən uca zirvəsində dayanan görkəmli elm fədaisinin işıqlı çöhrəsi canlanır. Eyni zamanda, onun simasında nəcib Azərbaycan qadını, vəfalı ömür-gün yoldaşı, fədakar ana obrazı görürük. Yüksək intellekt və mədəniyyət, dərin bilik, insanpərvərlik, vətənə məhəbbət və xeyirxahlıq kimi keyfiyyətlər Zərifə xanımın portretini tamamlayan əsas cizgilərdir.

Bunu Teleqraf.com-a Milli Məclisin Ailə, qadın və uşaq məsələləri komitəsinin sədri, professor Hicran Hüseynova deyib.

Professor bildirib ki, Zərifə qısa bir tarixi əhatə edən həyatında çox böyük işlər gördü: “O bu gün də onu tanıyanların qəlbində qayğıкеş, mehriban ana, sədaqətli ömür yoldaşı, istedadlı alim, bacarıqlı həkim, etibarlı dost, səmimi insan kimi yaşayır”.

Komitə sədri hesab edir ki, bu gün ölkəmizdə Zərifə xanımın 100 illiyinin qeyd olunması bir alimin xalqın gələcəyi naminə gördüyü hər hansı bir iş, söylədiyi fikir, yazdığı əsər onun tarixdə əbədi yaşamasına bariz nümunədir: “Akademik Zərifə Əliyevanın gördüyü nəhəng işlər, yazdığı fundamental əsərlər, hazırladığı çoxsaylı tibb kadrlar onu əbədiyaşar, ölməz edir”.

Qeyd edək ki, Prezident İlham Əliyev Akademik Zərifə Əliyevanın 100 illik yubileyinin qeyd edilməsi haqqında Sərəncamı imzalayıb.