"Yer kürəsində su axını orta həddən çox aşağıdır" - Ahlenbruk

"Yer kürəsinin təxminən yarısında su axını orta həddən aşağı və yaxud çox aşağı olub. Bu maraqlı məqamdır, çünki son 15 ayda, demək olar ki, hər ay temperatur rekordu qırmışıq".

Teleqraf.com xəbər verir ki, bu sözləri Birləşmiş Millətlər Təşkilatının Hava, İqlim və Su üzrə İxtisaslaşdırılmış Agentliyi - Ümumdünya Meteorologiya Təşkilatının (WMO) Hidrologiya, Su və Kriosfer proqramının rəhbəri Stefan Ahlenbruk COP29 çərçivəsində təşkil olunmuş "İqlim üçün su: Su məsələlərinin NDCs və NAPs-a inteqrasiyası" adlı tədbirdə deyib:

"Planetdə əvvəllər heç vaxt bu qədər isti olmayıb. Atmosferdəki bu istilik çayları qurudur. Həmçinin okeanlarda da rekord tempuraturlara şahid olduq. Okeanlarda və atmosferdə yüksək temperatur daha çox ekstremal yağışa səbəb olub. Beləliklə, biz çox şiddətli daşqınlarla xarakterizə olunan bir il yaşadıq. İqlim dəyişikliyi nəticəsində bütün dünyada buzlaqlar sürətlə azalır. Məsələn, son 2 il İsveçrə buzlaqlarının təxminən 10%-i əriyib. Bu da qlobal miqyasda gözlədiyimizdən daha sürətli ərimədir".

Birləşmiş Millətlər Təşkilatının Ətraf Mühit Proqramının (UNEP) Şirin Su Ekosistemləri və Bataqlıqlar Bölməsinin rəhbəri Diana Kopanski isə bildirib ki, şirin su ekosistemlərinin qorunması iqlim dəyişikliyi ilə mübarizədə əsas şərtdir:

"Qlobal temperatur artımını 1,5 dərəcə səviyyəsində saxlamaq üçün şirin su ekosistemlərinin qorunması vacibdir. Torf əraziləri dünyadakı torpaqların yalnız 3 %-ni əhatə etsə də, dünya meşələrində saxlanılan karbonun iki qatını özündə saxlayır. Su sevən bu ekosistemlərin qorunması karbonun tutulması və təmizlənməsi üçün həyati əhəmiyyət kəsb edir. İqlim dəyişikliyinə uyğunlaşma və həll yollarının potensialı geniş olsa da, bu istiqamətdə daha intensiv fəaliyyətlərə ehtiyac var".