Putin qalib gəlsə, bu ölkələr üçün təhlükə yaranacaq - Con Herbst

ABŞ-ın Ukraynadakı sabiq səfiri Con Herbst bildirib ki, Amerika siyasətçilərinin Ukraynaya münasibəti artıq bu payızda ABŞ Nümayəndələr Palatasına keçiriləcək seçkilərlə tənzimlənəcək.

Teleqraf.com xəbər verir ki, təcrübəli diplomat və Atlantik Şuranın Avrasiya Mərkəzinin rəhbəri Con Herbst Vaşinqtonda siyasi dairələrdə Ukraynaya dəstəyin tam olmasının vacibliyini vurğulayıb.

Diplomat deyib ki, Boris Conson hazırkı Qərb liderləri arasında Rusiyanın Ukraynaya təcavüzü məsələsində ən uzaqgörəni olub:

“O, Rusiyanın planlarını və müharibə hazırlığını görüb Ukraynaya səfər edən ilk Qərb lideri idi. Böyük Britaniya Ukraynanı ilk silahla təmin edən ölkə olub, halbuki ABŞ silahların tədarük edilib-edilməyəcəyini müzakirə edirdi. Beləliklə, Conson Qərbin siyasətini düzgün istiqamətə yönəltdi. Əminəm ki, Böyük Britaniyanın növbəti baş naziri də Ukraynanı dəstəkləyəcək. Amma o qədər ardıcıl, bu məqsədə sadiq və uzaqgörən olacaqmı, onu bilmirik. Tezliklə görəcəyik”.

Diplomat dünyada proqnoz edilən tənəzzülün Ukrayna olaylarına təsir edib-etməyəcəyinə dair proqnozunu da açıqlayıb: “Düşünürəm ki, bu amil Ukraynaya dəstək vəziyyətinə təsir edə bilər, lakin Rusiyanın Ukraynadakı müharibəsi ilə bağlı siyasətimiz düşünülsə, bu baş verməyəcək. Bu gün ABŞ hökumətinin Ukraynaya göstərdiyi dəstək həqiqətən də böyükdür, lakin bunu Vladimir Putinin Ukraynada qalib gələcəyi təqdirdə ABŞ-ın həm pul, həm də insan həyatı ilə ödəyəcəyi qiymətlə müqayisə etsəniz, bu rəqəmlər müqayisə olunmaz olacaq. Həmin qiymətlə müqayisədə bu qiymət kiçikdir. Putin Ukraynada qalib gəlsə, çoxlu sayda insanın həyatını məhv edəcək və bizim NATO müttəfiqlərimiz - Baltikyanı ölkələr, Polşa və Rumıniya birbaşa təhlükə altında olacaq. ABŞ-ın bu ölkələrin müdafiəsinin qiyməti bir neçə dəfə artacaq”.