Ciddi irəliləyiş var, Əliyevlə Paşinyan son görüşdə... - Arutyunyan

Azərbaycan Prezidenti İlham Əliyev və Ermənistan Baş naziri Nikol Paşinyan arasında keçirilən bütün görüşləri dialoq baxımından müsbət qiymətləndiririk.

Teleqraf.com xəbər verir ki, bunu Ermənistan baş naziri aparatının rəhbəri Araik Arutyunyan deyib.

“Əlbəttə, başlayan proses və sülh sazişinin imzalanmasının yaxın gələcəkdə reallığa çevrilməsini hədəfləyirik və bu təmaslar bu mənada faydalıdır”, - o bildirib.

Arutyunyan qeyd edib ki, Ermənistan sülh müqaviləsinin razılaşdırılmış bəndlər üzrə imzalanması üçün imkanlar görür.

Aparat rəhbəri Əliyevlə Paşinyanın Kazanda hansı məsələləri müzakirə etdiyi barədə ətraflı məlumat verməyib, sadəcə, masada olan geniş məsələlərin müzakirə edildiyini söyləyib.

“Sülh sazişi çərçivəsində ciddi irəliləyiş var. Hazırda sülh müqaviləsinin redaktə edilmiş versiyaları tərəflərin masasındadır. Yeni redaktələr olanda variantlar hazır olacaq və mübadilə aparılacaq. Yeni görüşə ehtiyac olarsa, o da olacaq”, - Arutyunyan əlavə edib.